سٹی 42 : گوجرانوالہ اور گردو نواح میں بھی طوفانِ باد و باراں کے بعد دن میں رات کا سماں نظر آنے لگا ۔
گوجرانوالہ کے مختلف علاقوں میں تیز آندھی اور طوفان باد و باراں کا سلسلہ جاری ہے ۔
گیپکو کے ریجن بھر میں متعدد فیڈر ٹرپ کرگئے، جس کے باعث مختلف علاقوں میں بجلی کی فراہمی متاثر ہوئی ہے ۔
سٹی42: آج اسلام آباد سمیت پنجاب کے مختلف شہروں میں آندھی اور طوفان کے باعث مختلف حادثات میں 10 افراد جاں بحق اور 51 زخمی ہوگئے۔
تھنڈر سٹارمز سے دس افراد جاں بحق
ریسکیو اداروں نے آج پنجاب کے کئی علاقوں میں آنے والے تھنڈر سٹارمز سے ہونے والے ھادثات میں دس افراد کے جاں بحق ہونے کی تصدیق کر دی ہے۔
پہلے پی ڈی ایم اے نے بتایا تھا کہ پنجاب کے کئی علاقوں میں تھنڈر سٹارمز سے سات افراد جاں بحق ہوئے ہیں۔
سب سے زیادہ جانی نقصان جہلم میں ہوا جہاں تین جانیں طوفان سے ہونے والے حادثات کی نذر ہو گئیں۔
راولپنڈی میں ایک شیخوپورہ، ننکانہ صاحب اور سیالکوٹ میں ایک ایک شخص تھنڈر سٹارم سے ہونے والے حادثات میں مارا گیا۔
پی ڈی ایم اے نے بتایا کہ یہ اموات بوسیدہ مکانات کے گرنے اور طوفان کے دوران غیر محفوظ مقامات پر ہونے کے باعث ہوئیں۔
طوفان کے باعث متعدد کچے اور بوسیدہ مکانات کو بھی نقصان پہنچا۔
اسلام آباد میں ژالہ باری، بارش کا پانی گھروں میں گھس گیا
اسلام آباد میں تیز آندھی کے ساتھ بارش ہوئی، ژالہ باری بھی ہوئی۔ شہر کے قدیم سیکٹر جی سکس ٹو، آب پارہ میں بارش کا پانی گھروں میں داخل ہوگیا۔ شہر کی کئی کچھی آبادیوں، فرانسس کالونی، چھیاسٹھ کوارٹرز، اڑتالیس کوارٹرز میں بارش سے نالے میں طغیانی کی صورتحال ہو گئی اور نالے کا پانی کچی آبادیوں کے گھروں میں چلا گیا۔
راولپنڈی میں نالہ لئی چڑھ گیا
راولپنڈی میں نالہ لئی میں پانی کی سطح بلند ہوگئی، بارشوں کے باعث راولپنڈی میں رین ایمرجنسی نافذ کردی گئی تھی تاہم بارش رک جانے کی وجہ سے نشیبی آبادیوں میں سیلابی صورتحال خطرناک نہیں ہوئی۔
لاہور میں ڈسٹ سٹارم اور تھنڈر سٹارم سے بھاری مالی نقصانات
لاہور میں آج ہفتہ کی شام پہلے ڈسٹ سٹارم آیا، پھر کئی علاقوں میں تھنڈر سٹارم آئے۔ آندھی اور گرج چمک کے ساتھ بارش ہوئی جس کے باعث پورے شہر کی بجلی بند ہوگئی۔ کئی درخت جڑوں سے اکھڑگئے، قذافی سٹیڈیم کے کئی بوتھ اڑگئے، فلڈ لائٹس کے پول گرگئے جس کی وجہ سے لاہور قلندرز اور کوئٹہ گلیڈی ایٹرز کی پریکٹس منسوخ کردی گئی۔
چکوال میں تھنڈر سٹارم
چکوال میں آج شام تھنڈر سٹارم کے باعث کلر کہار کے قریب موٹر وے ایم ٹو کو کئی گھنٹوں کے لیے بند کرنا پڑ گیا۔
گجرات میں تھنڈر سٹارم
گجرات شہر اور نواحی علاقوں سمیت وسیع علاقہ میں آج شام تھنڈر سٹارم سے بہت سے گھروں کی چھتوں پر نصب سولر پلیٹوں کو نقصان پہنچا، کئی ہورڈنگ بورڈوں کو نقصان پہنچا، تاہم اب تک کہیں جانی نقصان کی اطلاع نہیں ملی۔
شیخوپورہ، ننکانہ صاحب، میانولی اور سیالکوٹ میں تھنڈر سٹارم سے جانی نقصانات
شیخوپورہ، ننکانہ صاحب، میاں والی اور سیالکوٹ میں تھنڈر سٹارم کے دوران چلنے والی طوفانی ہواؤں سے ہونے والے حادثات میں تین افراد کے جاں بحق ہونے کی تصدیق ہوئی ہے۔ ان شہروں میں گھروں کی چھتوں پر نصب سولر پینل اور ڈش انٹینے اڑ کر ادھر ادھر جا گرنے کی بھی اطلاعات رپورٹ ہوئی ہیں۔ کئی کمزور گھوں کی دیواریں ر آندھی کے بے پناہ دباؤ سے گر گئیں۔
ملتان، حافظ آباد، گوجرانوالا، اٹک میں تھنڈر سٹارم سے نقصانات
ملتان، حافظ آباد، گوجرانوالا، اٹک اور سیالکوٹ میں بھی آندھی چلی، جس سے دن میں رات کا منظر ہوگیا، مختلف شہروں میں متعدد مقامات پر سولر پینل اڑگئے۔
ریسکیو حکام کے مطابق صوبے میں آندھی و طوفان میں 10شہری جاں بحق اور 51 زخمی ہوئے۔
پی ڈی ایم اے کے مطابق آج ہونے والی اموات بوسیدہ مکانات کےگرنے اور غیرمحفوظ مقامات پر ہونےکے باعث ہوئیں۔ لاہور میں درختوں کےگرنے اور سولرپینلز کو نقصان کے واقعات رپورٹ ہوئے۔
خیبر پختونخوا میں تھنڈر سٹارم
پنجاب کے علاوہ خیبرپختونخوا کے مختلف شہروں میں بھی بارش ہوئی۔ پشاور میں مٹی کا طوفان آیا تو مالا کنڈ، ایبٹ آباد، مردان، چارسدہ اور مانسہرہ سمیت مختلف شہروں میں بارش ہوئی۔
May 05, 2026
May 05, 2026
آج جمعہ کی شام آنے والے تھنڈر سٹارمز نے پنجاب میں بھاری جانی نقصان کر ڈالا۔ سرکاری حکام نے جانی نقصانات کی تفصیل جاری کر دی۔
ڈیزاسٹر سے نبٹنے کے ادارہ پاکستان ڈیزاسٹر مینیجمنٹ اتھارٹی پی ڈی ایم اے نے صوبہ پنجاب میں جانی نقصان کی رپورٹ میں بتایا ہے کہ 7شہری جانں بحق ہوئے اور 41 زخمی ہو گئے۔
پی ڈی ایم اے نے تصدیق کی کہ طوفانِ باد و باراں کی زد میں آ کر سب سے زیادہ جانی نقصان جہلم میں ہوا جہاں تین افراد ہلاک ہوئے۔
راولپنڈی میں ایک شیخوپورہ، ننکانہ صاحب اور سیالکوٹ میں ایک ایک شخص طوفان سے ہونے والے حادثات میں مارا گیا۔
پی ڈی ایم اے نے بتایا کہ یہ اموات بوسیدہ مکانات کے گرنے اور طوفان کے دوران غیر محفوظ مقامات پر ہونے کے باعث ہوئیں۔
طوفان کے باعث متعدد کچے اور بوسیدہ مکانات کو بھی نقصان پہنچا۔
ریلیف کمشنر پنجاب نبیل جاوید نے مزید طوفان آنے کے امکان کے پیش نظر صوبہ بھر کے کمشنرز،ڈپٹی کمشنرز اور ریسکیو اداروں کو الرٹ رہنے کی ہدایت کی ہے۔
ڈی جی پی ڈی ایم اے کے ڈائریکٹر جنرل عرفان علی کاٹھیا نے بتایا کہ حکومت پنجاب کی پالیسی کے مطابق متاثرہ خاندانوں کو مالی معاونت فراہم کی جائے گی۔
بجلی کی گرج چمک اور طوفانی صورتحال میں کھلے آسمان تلے ہرگز نہ جائیں ۔عرفان علی کاٹھیا
بچوں کا خاص خیال رکھیں انہیں بوسیدہ عمارتوں کے قریب ہرگز نہ جانے دی۔ڈی جی پی ڈی ایم اے
ایمرجنسی کی صورتحال میں پی ڈی ایم اے کی ہیلپ لائن 1129 پر کال کریں۔ترجمان
سٹی42: طوفان کے دوران ایک مسافر طیارہ شدید طوفانی ہواؤں کی زد میں آ گیا، مسافر بلند آواز سے کلمہ طیبہ کا ورد کرنے لگے۔ خوفناک حادثہ ٹل گیا۔ مشہور سیاستدان بھی اس طیارے میں سوار تھے۔
نجی ائیرلائن کی ائیربس 321 لاہور میں ڈسٹ سٹارم کے دوران علامہ اقبال ائیرپورٹ پر اترنے کے دوران شدید طوفانی ہواؤں میں پھنس کر پائلٹ کی مہارت کے سبب کسی حادثہ سے بچ گئی، ائیر ٹریفک کنٹرول نے اس فلائٹ کو فوراً کراچی واپس بھیج دیا، وہاں طیارہ خیریت سے لینڈ کر چکا ہے لیکن اب اس میں سوار 57 مسافروں نے دوبارہ لاہور آنے سے انکار کر دیا ہے۔ طیارے کے مسافروں نے فلائی جناح کے پائلٹ کی مہارت، عملہ کی کئیر اور تعاون کی بہت تعریف کی لیکن ان کا کہنا ہے کہ لاہور میں موسم کا اعتبار نہیں۔
آج شام لاہور میں شدید نوعیت کا ڈسٹ سٹارم آیا تو کئی طیارے فضا میں تھے۔ بعض مسافر طیاروں کا رخ بروقت دوسرے محفوظ ائیرپورٹس کی طرف موڑ دیا گیا تاہم کراچی سے لاہور آنے والا ایک مسافر طیارہ اس ڈسٹ سٹارم میں پھنس گیا۔
یہ فلائٹ اس ڈسٹ سٹارم کے وقت لاہور کی فضا میں ہی تھی۔ فلائٹ شدید طوفان کے باعث خوفناک حادثے سے بال بال بچ گئی۔ طیارے کی لینڈنگ کے دوران کراچی سے لاہور جانے والی نجی ائیرلائن فلائی جناح ائیر کی پرواز کئی منٹ تک آندھی کی زد میں رہی اور طیارے کو طوفان کے باعث شدید جھٹکے لگے، مسافروں کی چیخیں نکل گئیں۔
نجی ائیر لائن کی پرواز نائن پی 842 کے مسافر کلمہ طیبہ کا ورد کرتے رہے۔ پائلٹ کی مہارت کے طفیل طیارہ کامیابی سے لینڈ کر گیا۔ یہ ائیر بس 321 بڑے سائز کا طیارہ تھا۔ پائلٹ نے بڑی مہارت سے طیارے کو واپس اڑایا، ائیر ٹریفک کنٹرول نے طیارے کو کراچی واپس بھیج دیا
اس طیارے مین سفر کرنے والے سیاستدان اسد عمر نے بعد میں کراچی ائیرپورٹ پر صحافیوں کو بتایا کہ پروز کی لینڈنگ کے دوران اتنا ایکسٹریم پہلی دفعہ ہوا۔ اس وقت طیارہ آلموسٹ لینڈ کر رہا تھا، جھٹکے لگ رہے تھے، طیارہ بار بار نیچے جاتا تھا۔ اسد عمر نے کہا کہ پائلٹ کی مہارت کے سبب ہم بچ گئے۔ پائلٹ کا شکریہ۔
مسافروں نے بتایا کہ مشکل لمحات میں فلائٹ کے میزبانوں کو ٹیکنیکل عملہ نے کمال ذمہ داری اور پیشہ ورانہ مہارت کے ساتھ مسافروں کو سنبھالا اور فلائٹ کو مشکل صورتحال سے نکالا۔
یہ خوش قسمت جہاز اب کراچی لینڈ کر چکا ہے اور کچھ دیر بعد اسے دوبارہ لاہور روانہ کیا جا رہا ہے۔البتہ کراچی ائیرپورٹ خیریت سے اتر جانے کے بعد اس فلائٹ کے مسافروں میں سے 57 نے مزید سفر کرنے سے انکار کر دیا ہے، وہ کراچی ائیرپورٹ سے اپنے گھروں کو واپس جانا چاہتے ہیں۔
طوفان کے دوران اسلام آباد سے لاہور پہنچنے والے مسافروں سے بھرے جہاز پی کے 6385 بھی کراچی منتقل کر دیا گیا جبکہ شدید طوفان کے باعث کراچی کی 2 پروازیں پی کے 305، پی اے 405 کی روانگی میں تاخیر ہو رہی ہے۔
لاہور کے علامہ اقبال ائیرپورٹ پر آج شام طوفان کے باعث ٹیک آف کرنے والی کوئی فلائٹ منسوخ نہیں کی گئی،
May 05, 2026
May 05, 2026
سٹی 42 : لاہور میں اب سے کچھ دیر پہلے چلنے والی آندھی اور بارش کے باعث 6 مختلف حادثات رپورٹ ہوئے، جن کی زد میں آ کر خاتون سمیت 2 افراد جاں بحق، 6 زخمی ہو گئے ۔
ریسکیو حکام کے مطابق چوہنگ، پارک ویو سٹی میں زیر تعمیر مکان کی چھت گرنے سے 2 مزدور زخمی ہو گئے۔ زخمیوں میں 38 سالہ نوید اور 45 سالہ رمضان شامل ہیں، جنہیں جناح ہسپتال منتقل کردیا گیا ۔ اس کے علاوہ رائیونڈ روڈ، ایل ڈی اے سگنل کے قریب گھر کی چھت سے گر کر 21 سالہ علی حسن زخمی ہوا، جبکہ ملتان روڈ، جزاک سٹی میں زیر تعمیر مکان کی چھت سے گر کر مزدور جاں بحق ہو گیا، متوفی کی شناخت 40 سالہ زاہد کے نام سے ہوئی، جس کی لاش پولیس کے حوالے کر دی گئی ۔
ریسکیو حکام کا کہنا ہے کہ برکی روڈ، گھر کی بالائی منزل سے گرنے کے باعث 16 سالہ عمیر زخمی ہو گیا۔ رائیونڈ روڈ، انڈس ہسپتال کے قریب دیوار گرنے سے 55 سالہ کبریٰ بی بی زخمی ہوئی ۔ اس کے علاوہ چونگی امر سدھو، گھر کی چھت سے گر کر ایک بزرگ شہری جاں بحق، دوسرا زخمی ہو گیا، متوفی کی شناخت 60 سالہ نزیر کے نام سے ہوئی، لاش پولیس کے حوالے کر دی گئی، جبکہ زخمی 50 سالہ رمضان کو طبی امداد کیلئے جنرل ہسپتال منتقل کر دیا گیا ۔
ریسکیو حکام نے بتایا کہ تیز آندھی کے باعث مختلف شاہراہوں پر درخت گرنے سے ٹریفک کا نظام بھی متاثر ہوا، ٹریفک کی روانی بحال کرنے کیلئے ریسکیو اہلکاروں نے گرنے والے درختوں کو راستے سے ہٹا دیا ۔
سٹی 42: لاہور ایئرپورٹ پر موسم کی صورتحال بہتر ہوگئی، جس کے بعد پروازوں کو روانگی کی اجازت مل گئی۔
اے ٹی سی نے پروازوں کی روانگی کی کلیرنس دے دی۔
پی آئی اے کی پرواز پی کے 767 جدہ روانگی کے لئے تیار ، اس کے علاوہ ابو ظہبی جانے والی اتحاد ائیر ویز کی پرواز کی روانگی کا اعلان کردیا گیا ، جبکہ شارجہ جانے والی فلائی جناح کی پرواز کو بھی کلیرنس مل گئی۔
کوالالمپور جانے والی باتک ائیر رات بارہ تک تاخیر کا شکار ہے ۔
دوسرے شہروں میں اترنے والی تمام پروازیں لاہور آنے کے لئے تیار ہیں ۔
May 05, 2026
May 05, 2026
سٹی 42 : ضلع جہلم اور گرد و نواح میں شدید آندھی کے باعث مختلف علاقوں میں دیواریں، درخت اور گھروں کی چھتیں گرگئیں، جس کی وجہ سے خاتون سمیت کم از کم 3 افراد جاں بحق اور 10 سے زائد افراد زخمی ہو گئے۔
گل افشاں کالونی میں درخت گرنے کے باعث ایک نوجوان جاں بحق ہوا جبکہ ویسٹ کالونی میں ایک مکان کی چھت گرنے سے ایک خاتون جان کی بازی ہار گئی۔ اس کے علاوہ ڈھوک وہاب دین میں ہوٹل کی دیوار گرنے سے ایک ویٹر زندگی کی بازی ہار گیا۔
دینہ میں مویشی منڈی کے قریب دیوار گرنے سے 3 افراد شدید زخمی ہوئے جبکہ پنڈدادخان میں مکان کی چھت گرنے سے 4 افراد زخمی ہوئے۔ اس کے علاوہ تیز آندھی کے باعث شہر کے مختلف علاقوں میں کئی گھروں کی چھتوں پر نصب سولر پلیٹس، ہورڈنگ بورڈز اور دیگر سامان زمین بوس ہو گیا۔
متعدد گاڑیاں اور موٹر سائیکلیں بھی متاثر ہوئیں جنہیں گرنے والے درختوں اور بورڈز نے نقصان پہنچایا۔
سٹی 42 : طوفانِ باد و باراں کے باعث کراچی سے لاہور کی پرواز خوفناک حادثے سے بال بال بچ گئی.
شدید بارش اور موسمی خرابی کی وجہ سے 22 علامہ اقبال ایئرپورٹ پر پروازوں کو دشواری کا سامنا ہے ۔
ایئرپورٹ ذرائع کا کہنا ہے کہ لاہور ایئرپورٹ پہنچی دو پروازوں کو کراچی موڑ دیا گیا، کراچی سے لاہور پہنچی ایف ایل 842 نئے رن وے ٹچ کیا تو طوفان کی زد میں آگئی، جس کے بعد پائلٹ نے بڑی مہارت سے طیارے کو واپس اڑایا۔ ایئر ٹریفک کنٹرول (ATC) حکام نے صورتحال کا جائزہ لینے کے بعد حفاظتی اقدامات کے طور پر پرواز کا رخ دوبارہ کراچی ایئرپورٹ کی جانب موڑ دیا۔
اسلام آباد سے لاہور پہنچی پرواز پی کے 6385 بھی کراچی منتقل کر دی گئی۔ اس کے علاوہ شدید طوفان کے باعث کراچی کی 2 پروازیں پی کے 305، پی اے 405 بھی تاخیر کا شکار ہوگئیں ۔
موسم کی موجودہ صورتحال کے پیش نظر دیگر پروازوں کی شیڈولنگ بھی متاثر ہونے کا خدشہ ہے، جبکہ مسافروں کو ہدایت دی گئی ہے کہ وہ سفر سے قبل ایئرلائن سے رابطے میں رہیں۔
محکمہ موسمیات کے مطابق آئندہ چند گھنٹوں میں لاہور اور گرد و نواح میں مزید آندھی اور تیز بارش کا امکان ہے، جس کے باعث فلائٹ آپریشن میں تاخیر یا تبدیلی متوقع ہے۔
May 05, 2026
May 05, 2026
سٹی 42 : تیز ہواؤں کے بعد لاہور کے مختلف مقامات پر بارش شروع ہوگئی۔
شہر کے مختلف علاقے لکشمی چوک ،راوی روڈ سب ڈویژن ،شیرانوالہ گیٹ،مصری شاہ،باغبانپورہ،شاد باغ، شاہدرہ، سٹی سب ڈویژن کے اطراف بارش شروع ہوگئی۔ اس کے علاوہ گلبرگ،تاجپورہ، مصطفیٰ آباد، گجرپورہ،ایل ڈی اے ایونیو ون، جوہر ٹاؤن ،سبزہ زار،اسلام پورہ کے اطراف میں بھی بارش کا سلسلہ جاری ہے ۔
وزیر اعلیٰ پنجاب مریم نواز شریف کی خصوصی ہدایات پر واسا لاہور مکمل الرٹ ہے ۔
وائس چیئرمین واسا چوہدری شہباز احمد، ڈی جی واسا پنجاب طیب فرید اور ایم ڈی واسا غفران احمد نے تمام مرکزی شاہراہوں اور انڈر پاسز کو کلیئر رکھنے کی ہدایات کر دیں۔ انہوں نے تمام فیلڈ ٹیموں کو متحرک رہنے کی ہدایت کردی، کہنا ہے کہ بجلی کی بندش والے علاقوں میں ڈسپوزل اسٹیشنز کو جنریٹرز پر چلایا جائے۔
ایم ڈی واسا نے کہا کہ تمام ڈسپوزل اسٹیشنز کے پمپس کو آپریشنل رکھا جائے اور سکرینوں کو صاف رکھا جائے، تمام ٹاون ڈائریکٹرز اپنے ٹاؤنز کی مکمل مانیٹرنگ رکھیں ۔
سٹی 42 : سیالکوٹ شہر اور گرد و نواح میں طوفانی ہواؤں اور کالی گھٹاؤں نے دن کو تاریکی میں بدل دیا۔
تیزترین ہواؤں نے کچہری چوک میں درخت کو جڑسے اکھاڑدیا۔ آندھی اور طوفان کے باعث تحصیل ڈسکہ میں مارکی کی لپڑے سے بنی چھت گر گئی جس سے 33سالہ بختیاور نامی شخص زخمی ہوگیا ۔ اس کے علاوہ تحصیل پسرور بینی سلہریاں حویلی کی دیوار گرنے سے ایک شخص زخمی ہو گیا ۔
ڈپٹی کمشنر کیجانب سےریسکیو اورمحکمہ صحت کو الرٹ رہنے کی ہدایات کی گئی ہیں ۔
May 05, 2026
May 05, 2026
سٹی 42 : لاہور کے بعد شیخوپورہ اور گردونواح میں شدید آندھی اور مٹی کا طوفان آگیا ۔
طوفان کے باعث شہر کے مختلف علاقوں میں دن میں رات کا سماں دکھائی دینے لگا ۔
مختلف علاقوں میں لیسکو کے فیڈر ٹریپ ہوگئے، جس کی وجہ سے بجلی کی فراہمی معطل ہوگئی ۔
شیخوپورہ میں آندھی سے کئی عمارتوں کی چھتوں پر نصب ہورڈنگ بورڈ گر گئے، گھروں اور تجارتی پلازوں کی چھتوں سے سولر پینل اڑ جانے کی بھی اطلاعات موصول ہو رہی ہیں۔ ان نقصانات کی تفصیل جمع کی جا رہی ہے۔
سٹی42: سرِ شام ہی لاہور میں اندھیرا چھا گیا۔
تھنڈر سٹارم تو اب تک لاہور نہین پہنچا البتہ شام پونے پانچ بجے ڈسٹ سٹارم لاہور پہنچ گیا۔ آندھی نے اندھیر مچا دیا۔ بادلوں نے آسمان کو ڈھانپ لیا، شام کو ہی لاہور میں کئی علاقوں مین رات جیسا اندھیرا چھا گیا ہے۔
آندھی سے ہونے والے نقصانات کی تفصیلات جمع کی جا رہی ہیں۔ یہ ایک بریکنگ سٹوری ہے، مزید تفصیلات جاننے کے لئے اس پیج کو کچھ دیر بعد ری فریش کیجئے۔
شہر میں گرد، غبار اور شاپنگ بیگز کی بے پناہ گندگی
کئی ہفتوں سے لاہور میں سڑکوں اور گلیوں کی صفائی کے ناقص اہتمام کی قلعی آج آندھی سے کھل گئی۔ آندھی چلی تو ہر طرف موٹی مٹی اور ہزاروں شاپنگ بیگ اُڑ رہے تھے۔ اس آندھی کے ساتھ اڑنے والی مٹی نے سڑکوں اور گلیوں میں موجود خواتین اور مردوں کو بری طرح بد حواس کر دیا۔
شہری یہ کہتے پائے گئے کہ ماحول مین اس قدر مٹی موجود ہے تو صفائی کرنے والے روزانہ کیا کرتے ہیں۔ اگر شہریوں نے گرد و غبار کے ساتھ موٹی مٹی ہی پھانکنی ہے تو نام نہاد صفائی کے ذمہ دار ان اداروں پر ماہانہ کروڑوں روپے کی ٹیکس منی کیوں اجاڑی جاتی ہے۔
آج کے ڈسٹ سٹارم ڈیزاسٹر سے پہلے شہری بار ہا صفائی کے ناقص نظام کی نشان دہی کر چکے ہیں۔ بڑی سڑکوں پر مٹی اور گرد اٹھانے والی آٹومیٹک مشینوں سے مزین گاڑیاں روزانہ علی الصبح گشت کرتی ہیں لیکن مٹی جہاں ہوتی ہے وہیں چھوڑ جاتی ہیں۔
سڑکوں پر لکیریں کھینچنے کا نام صفائی!
چھوٹی سڑکوں، بازاروں اور گلیوں میں ہاتھ سے صفائی کرنے والے روزانہ صبح باقاعدگی سے جھاڑوں سے لکیریں کھینچتے ہیں۔ بیشتر صفائی کرنے والی اہلکار محض "لکیریں کھینچتے" ہوئے آگے بڑھتے جاتے ہیں۔ ان لکیروں سے شہریوں اور بازاروں کے دکانداروں کو یہ تاثر ملتا ہے کہ صفائی کا عملہ آیا تھا اور کچھ نہ کچھ کر کے گیا ہے لیکن عملاً مٹی اور بہت سا سالڈ ویسٹ وہین کا وہیں رہتا ہے۔
صفائی کرنے والے ورکرز شاپنگ بیگ، مٹی اور دیگر کوڑا کرکٹ تھوڑا بہت جمع کر کے ڈھیریاں بناتے جاتے ہیں لیکن اس ہیزرڈس سالڈ ویسٹ کو سڑکوں اور گلیوں سے ہٹا پر مناسب طریقہ سے ٹھکانے لگانے کا مستحکم اہتمام نہیں کیا جاتا ہے۔
آج جب آبدھی آئی تو ہر طرف مٹی اڑنے لگی جو شہر کے اندر پہلے سے موجود تھی۔
ڈسٹ سٹارم اپ ڈیٹ
لاہور ہائیکورٹ اور گردونواح میں تیز آندھی سے لاہور ہائیکورٹ بار میں بجلی بھی بند ہو گئی۔
شانو بابا چوک میں سائن بورڈ اور بجلی کے کھمبے گرے ہیں۔
گلبرگ مین بلیوارڈ میں صدیق ٹریڈ سینٹر جانب اوریگا سنٹر کے قریب کجھور کا ایک درخت گرا ہے۔
بوہڑ والا والا چوک جانب گڑھی شاہو چوک میں ایک درخت گرا ہے
تیز ہوائیں چلنے سے چھتوں پر لگی سولر پلیٹیں اڑ گئیں، درخت ٹوٹنے کے واقعات بھی رپورٹ ہوئے ہیں۔
ڈاکٹر ہسپتال جانب ٹھوکر کینال روڈ پر ایک بڑا درخت گرا ہے ۔
ٹریفک بلاک
ڈسٹ سٹارم سے بہت سی سڑکوں پر ٹریفک رک گیا اور پھر ہجوم بڑھنے سے ٹریفک بلاک ہو گیا۔ گلزار پل جانب کیمپس پل کینال روڈ پر ایک بڑا سائن بورڈ گرا ہے۔
منیر چوک جانب باغ علی ، کینٹ ایرایا میں ایک بڑا درخت گرا ہے۔
نشتر پارک سپورٹس کمپلیکس میں تیز آندھی اور طوفان سے نقصان ہوا ہے۔
قذافی سٹیڈیم کی پرانی بلڈنگ کی ٹائلز گر گئیں۔
تیز آندھی اور طوفان کے باعث سکیورٹی بیرئیرز بھی ہوا میں اڑ گئے۔
پاکستان سپر لیگ سیزن دس کے فائنل سے پہلے تیز آندھی اور طوفان کے باعث کوئٹہ گلیڈیٹرز اور لاہور قلندر کی ٹیموں کی پریکٹس منسوخ کرنا پڑ گئے۔
May 05, 2026
May 05, 2026
سٹی 42 : منڈی بہاءالدین شہر میں بھی گرج چمک کے ساتھ بارش کا سلسلہ جاری ہے ۔
منڈی بہاءالدین میں بارش کے بعد گرمی کی شدت میں کمی آگئی ، شہر کا موسم خوشگوار ہو گیا۔ تاہم تیز ہوائیں چلنے اور بارش ہونے سے گیپکو کے متعدد فیڈر ٹرپ کر گئے، جس کے بعد شہر کے مختلف علاقوں میں بجلی بند ہوگئی۔
ڈسکہ اور گردونواح میں گرد آلود تیز طوفان کی وجہ سے گیپکو کے متعدد فیڈر ٹرپ کر گئے۔
سٹی 42 : وزیرآباد اور گردونواح میں تیز آندھی اور بارش کے بعد گرمی کا زور ٹوٹ گیا اور موسم خوشگوار ہوگیا ۔
وزیرآباد اور گردونواح میں طوفان کے بعد تیز بارش شروع ہوگئی، طوفان کے باعث دارالحکومت کی طرح وزیرآباد میں بھی دن میں شام کا منظر نظر آنے لگا ۔
دوسری جانب گیپکو کے متعدد فیڈر طوفان کے باعث ٹرپ کر گئے، تیز آندھی کے باعث متعدد جگہوں پر سائن بورڈ اور درخت ٹوٹ کر گر گئے ۔ ابھی تک موصول ہونے والی معلومات کے مطابق وزیر آباد کے محلہ شیرو میں بجلی کا پول گرنے سے متعدد گاڑیاں تباہ ہو گئیں، جبکہ وزیر آباد شہر اور گردونواح میں بجلی کی فراہمی مکمل طور پر معطل ہو گئی ۔
May 05, 2026
May 05, 2026
سٹی 42 : اسلام آباد کےبعد گجرات بھی طوفانِ باد و باراں کی زد میں آگیا ۔
گجرات کے مختلف علاقوں میں گہرے بادل ، تیز اور گردونواح آلود ہوائیں چلنے سے دن کے وقت رات کا سماں ہوگیا ۔
تیز ہواؤں کے بعد جہاں پورے شہر کا موسم خوشگوار ہوگیا، وہیں مخلتف علاقوں میں بجلی کی فراہمی بھی معطل ہوگئی ۔
گجرات میں تیز آندھی کے ساتھ موسلا دھار بارش کا سلسلہ بھی جاری ہے ۔
سٹی42: تھنڈر سٹارم کلاؤڈ پنجاب پہنچ گئے۔ جنوبی پنجاب، وسطی اور شمالی پنجاب کے بہت سے شہروں، قصبوں اور دیہاتوں کے تھنڈر سٹارمز کی زد مین آنے کا قوی امکان ہے۔
میٹ ڈیپارٹمنٹ نے ہفتہ کی سہ پہر بتایا کہ "موجودہ موسمی نظام پنجاب کی طرف بڑھنے لگا۔"
اگلے 3 سے 6 گھنٹوں کے دوران پنجاب کے وسطی اور شمالی علاقوں میں بہت سے طوفانِ باد و باراں آ سکتے ہیں۔
گجرات میں تھنڈر سٹارم شروع ہو چکا ہے۔
حافظ آباد، گوجرانوالہ، منڈی بہاؤالدین اور گردونواح میں گرد آلود آندھی گرج چمک کے ساتھ بارش کا امکان ہے۔
سیالکوٹ، نارووال، لاہور، قصور، اوکاڑہ، شیخوپورہ، اور گردونواح میں گرد آلود آندھی گرج چمک کے ساتھ بارش کا امکان ہے۔
ساہیوال، فیصل آباد، سرگودھا، میانوالی، خوشاب، اور گردونواح میں بھی تھنڈر سٹارم آنے کا امکان ہے۔
بھکر، ملتان، ڈیرہ غازی خان، لیہ، ٹوبہ ٹیک سنگھ،اور گردونواح میں گرد آلود آندھی گرج چمک کے ساتھ بارش کا امکان ہے۔
جھنگ، مظفرگڑھ، خانیوال، بہاولنگر، بہاولپور اور گردونواح میں بھی طوفانِ باد و باراں کا امکان ہے۔
تھنڈر سٹارم کے ساتھ بعض مقامات پر ژالہ باری کا امکان ہے۔
May 05, 2026
May 05, 2026
سٹی 42 : جڑواں شہروں میں موسلا دھار بارش شروع ہوگئی، جس کے بعد واسا راولپنڈی کو ہائی الرٹ کردیا گیا ۔
ایم ڈی واسا محمد سلیم اشرف کا کہنا ہے کہ محکمہ موسمیات کی پشین گوئی پر واسا راولپنڈی ہائی الرٹ ہوچکی ہے، ساتھ ہی رین ایمرجنسی نافذ کردی گئی ہے۔ انہوں نے بتایا کہ عملہ ہیوی مشینری کے ساتھ فیلڈ میں موجود ہے، کسی بھی قسم کی ایمرجنسی سے نپٹنے کیلئے تیار ہیں۔
ایم ڈی واسا نے بتایا کہ محکمہ موسمیات کے مطابق گولڑہ کے مقام پر 10 ملی میٹر ، پی ایم ڈی 29 ,شمس آباد پر 32 ملی میٹر جبکہ کچہری 6 ملی میٹر بارش ریکارڈ کی جا چکی ہے۔
ایم ڈی واسا کے مطابق نالہ لئی کی مانیٹرنگ کی جارہی ہے تاہم ابھی نالہ لئی میں پانی کا بہاؤ معمول کے مطابق ہے۔ نالہ میں کٹاریاں کے مقام پر 5 فٹ جبکہ گوالمنڈی پل پر 4 فٹ ہے۔
ویب ڈیسک: بارش کے باعث موسم خوشگوار ہوگیا، شہر میں دن ایک بجے ہی شام کا سماں ہوگیا شہری گاڑیوں کی ہیڈلائٹ آن کرنے پر مجبور ہوگئے، راولپنڈی اسلام آباد کے مختلف علاقوں میں تیز آندھی اور بارش کی وجہ سے کئی علاقوں میں بجلی منقطع ہو گئی.
وفاقی دارالحکو مت اسلام آباد میں دن کے وقت اندھیرا چھا گیا، جڑواں شہروں میں دن کو رات ہوگئی اور کالی گھٹاﺅں کے بعد ژالہ باری کیساتھ طوفانی بارش ہوئی ہے ، راولپنڈی اسلام آباد کے مختلف علاقوں میں تیز آندھی اور بارش کی وجہ سے کئی علاقوں میں بجلی منقطع ہو گئی ہے۔بارش کے باعث موسم خوشگوار ہوگیا شہر میں دن ایک بجے ہی شام کا سماں ہوگیا اورشہری گاڑیوں کی ہیڈلائٹ بھی آن کرنے پر مجبور ہوگئے۔
شہر میں کالے بادلوں اور گردو غبار کے شدید طوفان سے ہر طرف اندھیرا چھا گیا ہے جس کے باعث دن میں رات کا منظر پیش کرنے لگا۔اسلام آباد اور راولپنڈی کے مختلف علاقوں میں تیز ہواﺅں اور گرج چمک کے ساتھ شدید بارش کا سلسلہ جاری ہے۔ ایبٹ آباد ،ہری پور،اٹک کے مختلف علاقوں میں بھی تیزآندھی و طوفان اور شدید بارش کی اطلاعات موصول ہوئی ہیں۔اسی طرح مردان کے علاقوں میں بھی تیز اور شدید بارش کے ساتھ ژالہ باری ہوئی اس کے ساتھ سوات مینگورہ بھی گرد شدید بارش ہوئی ۔
ندی میں شدید طغیانی کی اطلاعات موصول ہوئی ہیں۔ہری پور، خان پور،ایبٹ آباد، لوئر دیر، بونیر، صوابی ، مانسہرہ، ٹیکسلا، نوشہرہ میں بھی موسلادھار بارش سے بجلی کی سپلائی منقطع ہو گئی، اٹک میں بھی تیز ہواﺅں کے ساتھ بارش ہوئی جبکہ مختلف علاقوں میں درخت گرنے کی اطلاعات ہیں۔قبل ازیں این ڈی ایم اے نے موسمی ایڈوائزری الرٹ جاری کرتے ہوئے طوفانی بارشوں کا الرٹ جاری کیاتھا۔
این ڈی ایم کی جانب سے الرٹ میں پنجاب اور خیبرپختونخواہ کے مختلف اضلاع میں آندھی اور گرج چمک سے ساتھ بارش کا امکان ظاہر کرتے ہوئے راولپنڈی، اسلام آباد سمیت پنجاب کے کئی علاقوں میں طوفانی بارشوں کی پیشگوئی کی ہے۔این ڈی ایم اے کے مطابق تیز ہوائیں درختوں کے گرنے اور بجلی کے نظام میں خلل کا سبب بن سکتی ہیں۔گرد آلود طوفان سے عمارتوں کو نقصان اور حد نگاہ میں کمی کا خدشہ ہے۔
این ڈی ایم اے نے ہدایت جاری کرتے ہوئے کہا ہے کہ شہری غیر ضروری طور پر گھروں سے باہر نکلنے سے گریز کریں۔حفاظتی تدابیر اختیار کریں، موسمی حالات خطرناک ہو سکتے ہیں۔محکمہ موسمیات کے مطابق چترال، دیر، سوات، مالاکنڈ، شانگلہ، کوہستان، بٹگرام، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، پشاور، چارسدہ، نوشہرہ، صوابی، وزیرستان، کوہاٹ، کرک اور لکی مروت میں بارش کی توقع ہے جبکہ بنوں اور ڈیرہ اسماعیل خان میں چند مقامات پر بارش کا امکان ہے۔ ژوب، موسی ٰ خیل، بارکھان، خضدار اور لسبیلہ میں بارش ہونے کی توقع ہے، سندھ کے ساحلی علاقوں میں گرد آلود ہوائیں چلنے کا امکان ہے۔
May 05, 2026
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025
24 May, 2025