چرچ پر خودکش حملے میں 15 افراد مارے گئے

سٹی42:  دمشق  میں ایک چرچ میں داعش کے خودکش بم دھماکے میں کم از کم 15 افراد کی ہلاکت کی اطلاع ہے۔
سیکیورٹی ذرائع نے بتایا  کہ شام کے دارالحکومت دمشق کے ڈویلا محلے میں مار الیاس چرچ میں خودکش بمبار نے خود کو دھماکے سے اڑا لیا جس کے نتیجے میں کم از کم 15 افراد ہلاک ہو گئے۔

دسمبر میں بشار الاسد کی حکومت کا تختہ الٹنے کے بعد یہ واقعہ دمشق کے اندر پہلا خودکش حملہ ہے۔

شام کی وزارت داخلہ کا کہنا ہے کہ خودکش حملہ آور اسلامک اسٹیٹ کا رکن تھا۔ وزارت نے ایک بیان میں مزید کہا کہ وہ چرچ میں داخل ہوا، فائرنگ کی، اور پھر اپنی دھماکہ خیز جیکٹ سے دھماکہ کر دیا۔

ایک سیکیورٹی ذریعے نے نام ظاہر نہ کرنے کی شرط پر بتایا کہ حملے میں دو افراد ملوث تھے جن میں وہ شخص بھی شامل تھا جس نے خود کو دھماکے سے اڑا لیا۔

شام کے شہری دفاع، وائٹ ہیلمٹس کی سائٹ سے لائیو سٹریم، چرچ کے اندر سے تباہی کے مناظر دکھائے گئے ہیں، جس میں ایک خون آلود فرش اور بکھرے ہوئے چرچ کے پیو اور چنائی شامل ہیں۔