ویب ڈیسک:ملائیشیا کے سابق وزیراعظم مہاتیر محمد کی اہلیہ سیتی حسمہ محمد علی 100 برس کی عمر میں انتقال کرگئیں، ان کے انتقال کی تصدیق پیر کو مہاتیر محمد کے دفتر نے کردی۔
برطانوی خبر رساں ادارے رائٹرز کے مطابق ریاستی خبر رساں ادارے برنامہ نے بتایا کہ سیتی حسمہ نے نیشنل ہارٹ انسٹی ٹیوٹ میں آخری سانس لی۔ ان کے بیٹے اور کاروباری شخصیت مخزانی مہاتیر نے بھی والدہ کے انتقال کی تصدیق کی، تاہم فوری طور پر موت کی وجہ سامنے نہیں آسکی۔
سیتی حسمہ اور مہاتیر محمد کی ملاقات 1940 کی دہائی کے اواخر میں سنگاپور میں میڈیکل کی تعلیم کے دوران ہوئی تھی۔ دونوں نے رواں سال اگست میں اپنی شادی کی 70ویں سالگرہ منائی تھی۔ ان کے سات بچے ہیں، جن میں مخزانی مہاتیر، سماجی کارکن مرینا مہاتیر اور سیاست دان مختارز مہاتیر شامل ہیں۔
سیتی حسمہ ملائیشیا میں ایک معروف سماجی شخصیت بھی رہی ہیں اور انہوں نے صحت عامہ، خاندانی منصوبہ بندی اور سماجی بہبود سمیت مختلف شعبوں میں کام کیا۔ عوامی سطح پر انہیں سادہ مزاج اور خوش اخلاق شخصیت کے طور پر جانا جاتا تھا۔
ان کی شخصیت کو ان کے شوہر مہاتیر محمد کے مقابلے میں نسبتاً نرم مزاج سمجھا جاتا تھا۔ مہاتیر محمد ماضی میں اپنی سیاسی اور ذاتی کامیابیوں میں سیتی حسمہ کے کردار کو اہم قرار دے چکے ہیں۔ انہوں نے خاص طور پر اس عزم کو سراہا تھا جس کے تحت سیتی حسمہ نے ایسے دور میں یونیورسٹی کی ڈگری حاصل کی جب ملائیشیا کی ملائی خواتین کے لیے اعلیٰ تعلیم کا حصول عام نہیں تھا۔
مہاتیر محمد، جن کی عمر 101 برس ہے، ملائیشیا کے سب سے طویل عرصے تک وزیراعظم رہنے والے رہنماؤں میں شمار ہوتے ہیں۔ ان کا پہلا دورِ وزارتِ عظمیٰ 1981 سے 2003 تک جاری رہا، جس دوران ملک میں صنعتی اور معاشی ترقی کا نمایاں دور دیکھا گیا۔
مہاتیر محمد 2018 میں دوبارہ وزیراعظم بنے اور اس وقت دنیا کے معمر ترین سربراہِ حکومت قرار پائے۔ انہوں نے اپوزیشن اتحاد کی قیادت کرتے ہوئے اُس وقت کے وزیراعظم نجیب رزاق کو انتخابات میں شکست دی تھی۔ تاہم ان کی دوسری وزارتِ عظمیٰ دو سال سے بھی کم عرصے تک جاری رہی اور 2020 میں سیاسی اتحاد میں اختلافات کے باعث حکومت ختم ہوگئی۔
سیتی حسمہ کی وفات ایسے وقت میں ہوئی ہے جب مہاتیر محمد 101 برس کے ہیں۔ دونوں کی 70 سالہ ازدواجی زندگی ملائیشیا کی جدید سیاسی تاریخ کا نمایاں حصہ رہی، جبکہ سیتی حسمہ نے اپنے شوہر کے طویل سیاسی سفر کے دوران شریکِ حیات کے ساتھ ساتھ صحت اور سماجی بہبود کے شعبوں میں بھی اپنی الگ شناخت قائم کی۔