ویب ڈیسک: کیلیفورنیا کے جنوبی ساحلی علاقوں میں سمندری طوفانوں اور بلند لہروں کے باعث ساحلی املاک کو شدید نقصان پہنچا ہے، جبکہ متعدد مقامات پر ساحل سے ریت بھی ختم ہوگئی۔
خبر رساں ادارے رائٹرز کے مطابق مالیبو میں بحرالکاہل نے اداکار نکولس کیج کے گھر کے قریب زمین میں گڑھا نما شگاف پیدا کردیا، جبکہ ڈانا پوائنٹ کے بیچ روڈ پر لہروں نے ایک گھر تباہ کردیا اور مزید 16 گھروں کو خالی کرانے یا ان میں رہائش محدود کرنے پر مجبور کردیا۔
رائٹرز کے مطابق جنوبی کیلیفورنیا میں رواں موسم گرما میں ہونے والے نقصان کی وجہ مشرقی بحرالکاہل میں آنے والے متعدد سمندری طوفان اور ہریکینز ہیں، جن کی شدت ال نینو کے باعث بھی بڑھی۔ اگرچہ ان ہریکینز نے کیلیفورنیا میں براہ راست لینڈ فال نہیں کیا، تاہم ان سے پیدا ہونے والی بلند لہروں نے ساحل سے بڑی مقدار میں ریت ہٹا دی۔
ماہرین کے مطابق آنے والے مہینوں میں اس سے بھی زیادہ شدید لہریں آسکتی ہیں، خاص طور پر ایسے وقت میں جب موسمی تبدیلیاں بلند ترین مدوجزر کے ساتھ مل سکتی ہیں۔
یونیورسٹی آف کیلیفورنیا سانتا کروز کے سینٹر فار کوسٹل کلائمیٹ ریزیلینس کے تحقیقی ڈائریکٹر پیٹرک برنارڈ کے مطابق موسمی حالات ممکنہ خطرات کے اعتبار سے غیر معمولی موسمِ سرما کی جانب اشارہ کر رہے ہیں اور موسمیاتی تبدیلی ان اثرات کو بڑھا رہی ہے۔
کیلیفورنیا نے رواں ہفتے ال نینو سے مزید ممکنہ نقصانات کے پیش نظر ہنگامی حالت کا اعلان کیا ہے۔ ال نینو جون میں شروع ہوا تھا اور توقع ہے کہ اس کے اثرات رواں سال کے اختتام اور 2027 کے آغاز تک زیادہ نمایاں رہیں گے۔
رائٹرز کے مطابق جمعہ کو ایک اور ہریکین، پولو، میکسیکو کے بحرالکاہل کے ساحل سے دور موجود تھا، جس سے مزید بلند لہریں شمال کی جانب بڑھ سکتی ہیں۔ طوفانی لہروں اور ہریکین میری کے باعث ہونے والے کٹاؤ کے بعد سانتا مونیکا میں اس ہفتے کے اختتام پر ہونے والا پہلا اوشن وے فیسٹیول بھی منسوخ کردیا گیا۔
جنوبی کیلیفورنیا میں گزشتہ ایک صدی کے دوران سمندر کی سطح 8 سے 12 انچ (20 سے 30 سینٹی میٹر) بلند ہوئی ہے، جبکہ شدید ال نینو سمندر کی سطح میں عارضی طور پر مزید 6 سے 12 انچ (15 سے 30 سینٹی میٹر) اضافہ کرسکتا ہے۔
امریکی نیشنل اوشیانک اینڈ ایٹموسفیرک ایڈمنسٹریشن کے ماہر مائیکل جیکس کے مطابق ال نینو سے منسلک زیرِ آب کیلون لہر اکتوبر کے اوائل میں کیلیفورنیا پہنچ سکتی ہے، جس سے سمندر کی سطح میں عارضی طور پر مزید 6 سے 12 انچ اضافہ ہوسکتا ہے۔
کارلزبیڈ میں بھی ٹاماریک ساحل سے تقریباً راتوں رات ریت غائب ہوگئی۔ ماہرین کے مطابق ریاستی اور مقامی حکومتیں ساحلی املاک کو مضبوط بنانے، ساحل پر مزید ریت ڈالنے یا پتھروں سے قدرتی ٹیلوں کی تشکیل جیسے اقدامات کرسکتی ہیں، تاہم ہر علاقے کے لیے ایک ہی حل مؤثر نہیں ہوسکتا۔