نشتر پارک ( حافظ شہبازعلی) یونس خان کی رخصتی کے بعد پی سی بی نے بیٹنگ کوچ کی خالی آسامی پر فوری تقرری نہ کرنے کا فیصلہ کیا ہے۔
ذارئع کے مطابق پی سی حکام نے فی الحال ہیڈ کوچ مصباح الحق اور اسسٹنٹ ٹو منیجر شاہد اسلم کو ذمہ داری سونپنے کا فیصلہ کیا ہے کہ وہ ویسٹ انڈیز کے خلاف سیریز میں بلے بازوں کی خامیاں دور کرنے میں معاونت کریں گے،لاجسٹک مسائل کی وجہ سے دورہ انگلینڈ اور ویسٹ انڈیز میں بھی پاکستانی ٹیم کے ساتھ بیٹنگ کوچ نہیں ہوگا۔
ذرائع کا کہنا ہےکہ محمد یوسف کراچی میں شروع ہونے والے ٹیسٹ ٹیم کے کیمپ میں کھلاڑیوں کے ساتھ کام کریں گے، پاکستان اور ویسٹ انڈیز کے درمیان پانچ ٹی ٹوئنٹی اور دو ٹیسٹ میچز جولائی، اگست میں شیڈول ہیں۔
خیال رہے کہ یونس خان نے ٹیم کے دورہ انگلینڈ کے لیے روانگی سے دو روز پہلے بیٹنگ کوچ کا عہدہ چھوڑنے کا اعلان کیا تھا، ڈربی میں موجود قومی ٹیم کے ساتھ اس وقت کوئی بیٹنگ کوچ نہیں تاہم دورہ ویسٹ انڈیز کے لیے نیشنل ہائی پرفارمنس کے بیٹنگ کوچ محمد یوسف کو بجھوائے جانے کی باتیں گردش کررہی تھیں۔