(حسنین محی الدین) تیز گیند بازی سے بھارتی بیٹنگ لائن اپ کے بخیے ادھیڑنے والے پاکستانی گیند باز شاہین شاہ آفریدی کا میچ کے بعد کیا جانے والے ٹویٹ وائرل ہو گیا۔
تفصیلات کے مطابق گزشتہ روز ایشیا کپ ون ڈے فارمیٹ میں بھارت کے خلاف پاکستانی ’پیس ٹریو ‘نے شاندار کارکردگی کا مظاہرہ کرتے ہوئے تمام 10 وکٹیں حاصل کرتے ہوئے منفرد اعزاز اپنے نام کیا ، جس کے بعد پوری دنیا میں پاکستانی پیس اٹیک کی دھاک بیٹھ گئی ہے، ہر طرف شاہین شاہ آفریدی ، نسیم شاہ اور مسٹر 150 حارث رؤف کے چرچے ہیں۔
ایسے میں پاکستانی پیس اٹیک کو فرنٹ سے لیڈ کرنے والے شاہین شاہ آفریدی نے روایتی حریف بھارت کے خلاف بہترین پرفارمنس کے بعد سوشل میڈیا سائٹ ٹویٹر پر پوسٹ کی جس میں انہوں اپنی ابتدائی دونوں وکٹوں کی تصویر بھی شیئر کی اور لکھا ’’بیشک تمام تعریفیں اللہ تعالیٰ کیلئے ہیں ، اور ساتھ میں انہوں نے امی ابو کا شکریہ بھی ادا کیا۔
Beshak sari tareefain Allah pak ke liye!
— Shaheen Shah Afridi (@iShaheenAfridi) September 2, 2023
Thank you Ammi Abbu. ❤️ pic.twitter.com/C5NQxfAvV3
واضح رہے کہ شاہین شاہ نے بھارت کے خلاف 4 وکٹیں حاصل کیں ان کی ابتدائی دو وکٹیں بھارتی کپتان روہت شرما اور ویراٹ کوہلی کی تھیں، روہت شرما کو 11 رنز جبکہ ویراٹ کو صرف 4 رنز پر ہی پویلین واپس جانا پڑا، میچ کا نتیجہ کچھ یوں نکلا کہ بارش جیت گئی ، بھارت نے پاکستان کو جیت کیلئے 267 رنز کا ہدف دیا لیکن بارش نے بھارت کو بری ہار سے بچا لیا اور پاکستانی بلے بازوں کو میدان میں اترنے کا موقع ہی نہ ملا اس طرح دونوں ٹیموں کو ایک ایک پوائنٹ دے دیا گیا ۔
بھارت کے خلاف میچ کے بعد بات چیت کرتے ہوئے قومی ٹیم کے اسٹار بولر شاہین آفریدی نے کہا ہے کہ میچ نہیں ہوا اگر ہوتا تو رزلٹ ہمارے ہاتھ میں تھا،ان کا کہنا تھا کہ مجموعی طور پر ایک اننگز میں ٹیم کی پرفارمنس بہت اچھی تھی، مگر موسم کا ہم کچھ نہیں کرسکتے، ہماری ٹیم نے بہت اچھی پرفارمنس دی ، ہماری ٹیم نمبر ون ہے اور نمبر ون کی حقدار بھی ہے۔