سٹی42: گوشوارے جمع کروانے کا آج آخری روز ہے اور شہریوں کے پاس صرف چند گھنٹے باقی رہ گئے ہیں۔ مالی سال 2024-25 کے انکم ٹیکس گوشوارے بروقت جمع نہ کروانے کی صورت میں شہریوں کو جرمانوں اور قانونی پیچیدگیوں کا سامنا کرنا پڑ سکتا ہے۔

آخری روز فیڈرل بورڈ آف ریونیو (ایف بی آر) کے آئرس سسٹم پر غیر معمولی بوجھ دیکھنے میں آیا ہے، جس کے باعث فارم فائلنگ اور سبمیشن میں صارفین کو شدید مشکلات پیش آ رہی ہیں۔ ٹیکس گزاروں کا کہنا ہے کہ سسٹم کی سست رفتاری اور بار بار تکنیکی خرابیوں کے باعث قیمتی وقت ضائع ہو رہا ہے اور کئی افراد تاحال اپنے گوشوارے مکمل نہیں کر سکے۔

ٹیکس بار ایسوسی ایشن نے ایف بی آر سے تاریخ میں توسیع کی اپیل کی ہے اور مطالبہ کیا ہے کہ عوام کی سہولت کے لیے فوری فیصلہ کیا جائے۔ ایف بی آر حکام کو سسٹم کی استعداد بڑھانے اور موجودہ تکنیکی مسائل کے فوری خاتمے کی بھی ہدایت دی گئی ہے۔

دوسری جانب تنخواہ دار طبقے سمیت کاروباری افراد کو ہدایت کی گئی ہے کہ وہ آج ہر صورت میں اپنے ٹیکس گوشوارے جمع کروائیں تاکہ ممکنہ قانونی کارروائی سے بچا جا سکے۔