سٹی 42: دفتر خارجہ نے پاکستانی خصوصی اقتصادی زون میں بھارتی بحری جہاز کی مبینہ اشتعال انگیز کارروائی پر بھارتی ناظم الامور کو طلب کرکے شدید احتجاج ریکارڈ کرایا ہے۔
ترجمان دفتر خارجہ سجاد حیدر خان کے مطابق بھارتی بحری جہاز نے پاکستانی بحری جہاز کے انتہائی قریب جارحانہ نقل و حرکت کی، جس کے نتیجے میں دونوں بحری جہازوں کے درمیان ٹکر ہوئی بھارتی کارروائی بین الاقوامی قانون اور 1991 کے دوطرفہ معاہدے کی سنگین خلاف ورزی ہے، جسے پاکستان نے سختی سے مسترد کردیا ہے۔
دفتر خارجہ نے بھارت پر زور دیا ہے کہ وہ بین الاقوامی قوانین اور دوطرفہ معاہدوں کی سختی سے پابندی کرے اور جنوبی ایشیا کو مزید عدم استحکام سے دوچار کرنے والی غیر ذمہ دارانہ کارروائیوں سے باز رہے۔
ترجمان کے مطابق پاکستانی ہائی کمیشن نئی دہلی میں بھی بھارتی وزارت خارجہ کو احتجاجی مراسلہ دے گا پاکستان نے عالمی برادری سے بھی بھارت کی مبینہ اشتعال انگیز پالیسی کا نوٹس لینے کا مطالبہ کیا ہے۔