سٹی 42: وزیراعظم محمد شہباز شریف سے پاک جاپان گروپ کے چیف ایگزیکٹو آفیسر چوہدری آصف محمود نے ملاقات کی، جس میں کاروباری برادری کو سہولیات کی فراہمی، ملکی برآمدات بڑھانے اور بیرون ملک مقیم پاکستانیوں کی فلاح و بہبود سے متعلق امور پر گفتگو ہوئی۔
ملاقات میں بیرون ملک مقیم پاکستانیوں کو سرمایہ کاری کے لیے سازگار ماحول فراہم کرنے اور ان کے مسائل کے حل کے لیے مؤثر اقدامات پر بھی تبادلہ خیال کیا گیا۔
وزیراعظم محمد شہباز شریف نے کہا کہ حکومت کاروباری برادری کو سہولیات کی فراہمی، سرمایہ کاری کے فروغ اور برآمدات میں اضافے کے لیے ہر ممکن اقدامات کر رہی ہے۔
ملاقات میں پاکستان اور جاپان کے درمیان تجارتی و اقتصادی تعاون کو مزید وسعت دینے کے امور بھی زیر غور آئے۔
وزیراعظم نے پاکستانی مصنوعات کو عالمی منڈیوں میں فروغ دینے، نئی بین الاقوامی منڈیوں تک رسائی بڑھانے، برآمد کنندگان کو درپیش مشکلات دور کرنے اور ملکی برآمدات کے حجم میں اضافے کے لیے مؤثر اقدامات کی اہمیت پر زور دیا۔
وزیراعظم کے مشیر ہارون اختر بھی ملاقات میں موجود تھے۔