سٹی 42 : وزیرخارجہ اسحاق ڈار نے آج چین کے خصوصی انتظامی علاقے ہانگ کانگ کے چیف ایگزیکٹو جان لی سے ملاقات کی۔
ترجمان دفتر خارجہ کے مطابق اسحاق ڈار نے چیف ایگزیکٹو کو بین الاقوامی ثالثی کی تنظیم (IOMed) کے کامیاب قیام پر مبارکباد دی۔ انہوں نے ہانگ کانگ کے مشرق اور مغرب کو جوڑنے والے عالمی مرکز کے منفرد کردار اور بین الاقوامی ثالثی میں بڑھتی ہوئی اہمیت کو اجاگر کیا۔ وزیرخارجہ نے پاکستان اور ہانگ کانگ کے درمیان دیرینہ دوستی کو یاد کیا ۔
وزیر خارجہ نے "ون کنٹری، ٹو سسٹمز" فریم ورک کے تحت ہانگ کانگ کی شاندار معاشی اور سماجی ترقی کو سراہا۔
ترجمان دفتر خارجہ کا کہنا ہے کہ دونوں راہنماؤں نے معیشت، سرمایہ کاری اور تجارت کے مختلف شعبوں میں تعاون کو مزید گہرا کرنے کے لیے تجاویز پر تبادلہ خیال کیا۔ وزیر خارجہ نے صدر شی جن پنگ کے وژن سے متاثر ہو کر IOMed کے قیام کو ایک سنگ میل قرار دیا۔ انہوں نے ہانگ کانگ میں مقیم پاکستانی کمیونٹی کی دونوں ممالک کے تعلقات کو مضبوط بنانے اور شہر کی معاشی و ثقافتی تنوع میں کردار کی بھی تعریف کی۔
چیف ایگزیکٹو نے وزیر خارجہ کے دورے کا پرجوش خیرمقدم کیا, انہوں نے ہانگ کانگ اور پاکستان کے درمیان تعاون کو مزید فروغ دینے کے عزم کا اظہار کیا۔
ترجمان دفتر خارجہ کے مطابق وزیر خارجہ اسحاق ڈار ہانگ کانگ میں بین الاقوامی ثالثی کی تنظیم (IOMed) کے قیام سے متعلق کنونشن پر دستخط کی سرکاری تقریب میں شرکت کے لیے موجود ہیں۔