سٹی42:  بانی کے اس بیان کی تردید ہو گئی کہ ان کے بیٹے قاسم اور سلیمان پاکستان آ کر احتجاج میں شامل نہیں ہوں گے۔

 تحریک انصاف نے اعلیٰ ترین سطح پر اس بیان کی تردید کی ہے اور کہا ہے کہ قاسم اور سلیمان کے پاکستان آنے کی تاریخ طے ہ ہونا باقی ہے۔ وہ پاکستان آئیں گے اور احتجاج میں بھی شریک ہوں گے۔

 پی ٹی آئی کے مرکزی سیکرٹری اطلاعات شیخ وقاص اکرم نے قاسم اور سلیمان کو پاکستان آنے سے روکنے کی خبروں کو جھوٹا قرار دے دیا اور اس معاملہ پر تحریری بیان جاری کیا ہے۔۔

اپنے تحریری بیان میں شیخ وقاص اکرم نے ان خبروں کی تردید کی جن میں عمران خان کی جانب سے قاسم اور سلیمان کے پاکستان نہ آنے کا کہا گیا ہے۔

شیخ وقاص اکرم نے کہا کہ عمران خان کے بچے پاکستان آئیں گے، صرف تاریخ طے ہونا باقی ہے، ‏بانی نے قاسم اور سلیمان کو پاکستان آنے سے نہیں روکا۔

عمر ایوب کا مختلف بیان

قومی اسمبلی میں اپوزیشن لیڈر عمر ایوب  خان سے کسی صحافی نے قاسم اور سلیمان کے پاکستان نہ آنے کے متعلق پوچھا تو عمر ایوب خان نے کہا  کہ عمران خان کے بیٹے واشنگٹن ڈی سی میں مہم چلا رہے ہیں، ان کی مرضی ہے۔ وہ جب بھی آنا چاہیں آسکتےہیں۔

اس سے پہلے  یہ خبر  آئی تھی کہ عمران خان نے اڈیالہ جیل میں اپنے بیٹوں کی پاکستان آمد کے متعلق سوال کے جواب میں صحافی کو بتایا تھا کہ ان کے بیٹے پاکستان نہین آئیں گے اور یہاں کسی احتجاج میں شریک نہیں ہوں گے۔ 

 اس خبر کو لے کر میڈیا اور سوشل میڈیا میں یہ بات پھیل گئی کہ بانی نے دوسروں کو تو اپنی جیل سے رہائی کے لئے احتجاج کرنے کے لئے کہا ہے لیکن اپنے بیٹوں قاسم اور سلیمان کو  احتجاج کے لئے پاکستان آنے سے روک دیا ہے۔