حسن علی: حکومت نے صوبے میں سیاحت اور ثقافتی ورثے کے فروغ کے لیے پنجاب سیاحت و ورثہ اتھارٹی ایکٹ 2025 پنجاب اسمبلی میں پیش کر دیا۔
بل کے تحت نئی اتھارٹی تشکیل دی جائے گی جس کے چیئرپرسن وزیراعلیٰ پنجاب جبکہ وائس چیئرپرسن وزیرِ سیاحت ہوں گے۔
بل کے متن کے مطابق سیکرٹری سیاحت، سیکرٹری فنانس اور سیکرٹری پی اینڈ ڈی اتھارٹی کے ممبران کے طور پر فرائض انجام دیں گے۔
اتھارٹی صوبے میں سیاحت اور ورثے کے فروغ کے لیے پالیسی اور گائیڈ لائنز طے کرے گی اور متعلقہ اداروں کے ساتھ مل کر سیاحتی سرگرمیوں کے فروغ پر کام کرے گی۔
اتھارٹی کو سیاحتی مقامات کی میپنگ، ریکارڈ مرتب کرنے، ضابطہ اخلاق وضع کرنے، سیمینارز اور ورکشاپس منعقد کرنے سمیت وسیع اختیارات حاصل ہوں گے۔
بل کے مطابق اتھارٹی پبلک پرائیویٹ پارٹنرشپ کو فروغ دے گی اور سیاحتی مقامات کی واگزاری، انسپکشن ٹیموں کی تشکیل اور قوانین کی خلاف ورزی پر جرمانے عائد کرنے کا اختیار بھی رکھے گی۔
اتھارٹی کا ڈائریکٹر جنرل چیف ایگزیکٹو آفیسر ہوگا جبکہ آڈیٹر جنرل اس کے مالی امور کا آڈٹ کرے گا۔
بل کو دو ماہ کے لیے متعلقہ کمیٹی کے سپرد کیا جائے گا، جس کی رپورٹ کے بعد اسے اسمبلی سے منظور کرایا جائے گا، اور حتمی منظوری گورنر پنجاب سردار سلیم حیدر خان دیں گے۔