ویب ڈیسک : جاپان دارالحکومت ٹوکیو کےمیں ایک افسوسناک حادثہ پیش آیا، جہاں 67 گاڑیاں آپس میں ٹکرا گئیں، جس کے نتیجے میں 2 افراد ہلاک اور 26 زخمی ہو گئے۔
جاپانی میڈیا کے مطابق جمعہ کے روز دارالحکومت ٹوکیو کے شمال مغرب میں واقع صوبہ گنما کی ایک ایکسپریس وے پر سڑسٹھ گاڑیوں کے درمیان ہونے والے ایک بڑے ٹریفک حادثے میں دو افراد ہلاک ہو گئے، زخمیوں میں سے پانچ کی حالت تشویش ناک ہے۔
پولیس کے مطابق یہ حادثہ شام تقریباً 7 بج کر 30 منٹ پر میناکامی کے علاقے میں کان ایٹسو ایکسپریس وے کی باہر جانے والی لین میں پیش آیا، جہاں برف باری کی وجہ سے سڑک پر پھسلن پیدا ہو گئی تھی، جس کے باعث 2 ٹرک آپس میں ٹکرا گئے۔ پولیس نے بتایا کہ حادثہ اس وقت ہوا جب ایک حادثے کی وجہ سے ایک ٹرک رکا ہوا تھا، پھسلن کی وجہ سے دوسرا ٹرک آ کر اس سے ٹکرا گیا، جس کے بعد گاڑیاں آ آ کر ٹکراتی رہیں اور تقریباً 300 میٹر تک لمبی قطار بن گئی۔
پولیس کا کہنا ہے کہ حادثے کے نتیجے میں 20 گاڑیوں میں آگ لگ گئی، جسے بجھانے میں سات گھنٹے سے زیادہ وقت لگا۔
پولیس کے مطابق ٹوکیو سے تعلق رکھنے والی 77 سالہ خاتون، جو خاندان کے ہمراہ گاڑی کی پچھلی نشست پر بیٹھی تھیں، جان کی بازی ہار گئیں، جب کہ ایک بڑے ٹرک کی ڈرائیور سیٹ سے ایک لاش برآمد ہوئی۔
ریسکیو حکام کے مطابق برف باری اور پھسلن کے باعث امدادی کاموں میں مشکلات کا سامنا ہوا۔ حادثے کے بعد ایکسپریس وے کے اس حصے کو بند کر دیا گیا جہاں بری طرح تباہ شدہ گاڑیوں کی ایک قطار لگی ہوئی تھی، جن میں سے بعض مکمل طور پر جل کر ناقابلِ شناخت ہو چکی تھیں۔