سٹی42: آزاد کشمیر میں وزیراعظم انوار الحق کے اسمبلی میں اکثریت سے محروم ہو جانے کے باوجود استعفیٰ نہ دینے کے بعد پاکستان پیپلز پارٹی نے تحریک عدم اعتماد لانے کے لئے حتمی مشاورت کا آغاز کر دیا۔ تحریک عدم اعتماد میں وزیراعظم کے عہدہ کے امیدوار کی نشاندہی ضروری ہے، پیپلز پارٹی کی قیادت آج یہ فیصلہ کرنے کے لئے سر جوڑ کر بیٹھ گئی کہ نیا وزیراعظم کسے نامزد کیا جائے۔ آزاد کشمیر کا نیا وزیراعظم کون ہو گا، یہ فیصلہ کچھ گھنٹوں میں متوقع ہے۔
پیپلز پارٹی کے ذمہ دار ذرائع نے بتایا ہے کہ پارٹی کی قیادت وزارت عظمیٰ کے لیے چوہدری یاسین اور چوہدری لطیف اکبر کے ناموں پر غور کر رہی ہے۔ حتمی فیصلہ آج رات ہی ہونے کا امکان ہے جس کے بعد صبح کسی وقت تحریک عدم اعتماد جمع کروا دی جائے گی۔
پارٹی قیادت نے آزاد کشمیر اسمبلی میں اپنے تمام ارکان کو اسلام آباد طلب کر لیا ہے۔ ان میں سے بیشتر ارکان پہلے ہی اسلام آباد میں موجود ہیں۔
آج شام پیپلز پارٹی کی اعلیٰ قیادت کی مشاورتی مجلس میں بلاول بھٹو زرداری اور فریال تالپور بھی شریک ہیں۔
باخبر ذرائع کے مطابق آزاد کشمیر اسمبلی کے ارکان کی اکثریت چوہدری محمد یاسین کے نام پر متفق ہے۔ بعض رہنما چوہدری لطیف اکبر کو متفقہ امیدوار کے طور پر سامنے لانے کے حامی ہیں۔
آزاد کشمیر کی وزارت عظمیٰ کس کو ملے گی، اقتدار کا ہما کس کے سر پر بیٹھے گا؛ اس کا فیصلہ چند گھنٹوں میں سامنے آنے والا ہے۔