ویب ڈیسک : عوامی نیشنل پارٹی کے رہنما ارباب زین عمر  پاکستان مسلم لیگ (ن) میں شامل ہوگئے ۔

 پشاور میں ہونے والی شمولیتی تقریب میں وفاقی وزیر امیر مقام،ایم این اے ثمر بلور اور ایم پی اے ثوبیہ شاہد شریک ہوئیں۔تقریب سے خطاب میں وفاقی وزیر امیر مقام نے کہا کہ ن لیگ اور نواز شریف کے قافلے میں شامل ہونے والوں کو مبارک باد پیش کرتا ہوں۔ انہوں نے کہا کہ ارباب زین عمر، اُن کے ساتھیوں اور کارکنان کا شکریہ ادا کرتا ہوں۔

  امیر مقام نے کہا کہ بدقسمتی سے صوبے کے عوام کو 13 سال میں پیچھے دھکیل دیا گیا، وزیراعلی نے کہا کہ میں تاریخ بنانا چاہتا ہوں، ان کو کہتا ہوں کہ پختونوں کی تاریخ پہلے سے بنی ہوئی ہے۔ انہوں نے کہا کہ پختونوں کو نئی تاریخ دینے کی ضرورت نہیں، آپ لوگوں نےصوبے کے عوام کی ساکھ کو متاثر کیا ہے۔ پختونوں کی تاریخ ہزاروں سال پرانی ہے، آپ کو بنانے کی ضرورت نہیں، افسوس کی بات ہے کہ خیبر پختونخوا کابینہ کو قیدی کی منظوری سے مشروط کیا گیا ہے۔

انہوں نے مزید کہا کہ وزیراعلیٰ کو صوبے میں دہشت گردی کی آگ کو بجھانے کے لیے پلان دینا چاہیے۔