ویب ڈیسک: ملک میں سمگل شدہ تیل اور غیر قانونی آئل سپلائی چین کے خلاف کارروائی کرتے ہوئے حکومت نے پیٹرول پمپس سے متعلق بڑا فیصلہ کر لیا ہے۔ پیٹرولیم ڈویژن نے تمام پیٹرول پمپس پر آٹو میٹک ٹینک گیجنگ (ATG) سسٹم لازمی طور پر نافذ کرنے کا اعلان کر دیا ہے۔

ذرائع کے مطابق آٹو میٹک ٹینک گیجنگ سسٹم کے ذریعے پیٹرولیم مصنوعات کی مقدار، اسٹوریج اور فروخت کا مکمل ریکارڈ خودکار انداز میں محفوظ ہوگا۔ اس نظام کے تحت ٹینک سے نوزل تک تمام ڈیٹا ڈیجیٹل شکل میں ریکارڈ کیا جائے گا، جس سے فیول سپلائی چین کی مکمل ڈیجیٹائزیشن ممکن ہو سکے گی۔

پیٹرولیم ڈویژن کے ایکسپلوسوز ڈیپارٹمنٹ نے اس حوالے سے باضابطہ نوٹیفکیشن جاری کر دیا ہے، جس میں تمام آئل مارکیٹنگ کمپنیوں کو ہدایت دی گئی ہے کہ وہ 10 فروری تک اپنے تمام پیٹرول پمپس پر اے ٹی جی سسٹم نصب کریں۔

نوٹیفکیشن میں واضح کیا گیا ہے کہ مقررہ تاریخ کے بعد کسی قسم کی رعایت نہیں دی جائے گی اور 10 فروری کے بعد آٹو میٹک ٹینک گیجنگ سسٹم کے بغیر کسی پیٹرول پمپ کو اسٹوریج لائسنس جاری نہیں کیا جائے گا۔