سٹی42: بسنت 2026 کے دوران مذہبی ہم آہنگی اور امنِ عامہ برقرار رکھنے کے لیے حکومتِ پنجاب نے دفعہ 144 نافذ کر دی ہے۔ اس کے تحت بسنت کے دوران مذہبی یا سیاسی علامات والی پتنگوں کی تیاری، خرید و فروخت اور استعمال پر مکمل پابندی عائد کر دی گئی ہے۔
پنجاب کائٹ فلائنگ ایکٹ 2025 کے تحت دھاتی تار، نائلون یا شیشے سے لیپ شدہ ڈور کے استعمال پر بھی مکمل پابندی ہے۔ بسنت کے دوران صرف بغیر تصویر کی یک رنگی یا کثیر رنگی پتنگوں کے استعمال کی اجازت ہوگی۔ حکومتی نوٹیفیکیشن کے مطابق 30 روز کے لیے مذہبی و سیاسی نقش و نگار والی پتنگوں کی تیاری، نقل و حمل، ذخیرہ، فروخت اور استعمال ممنوع ہوگا۔
دفعہ 144 کے تحت احکامات فوری نافذ العمل ہیں اور قانون نافذ کرنے والے اداروں کو سخت کارروائی کی ہدایت کی گئی ہے۔ ڈپٹی کمشنر لاہور نے پنجاب کائٹ فلائنگ ایکٹ 2025 کے تحت بسنت 2026 کا نوٹیفیکیشن جاری کیا ہے، جس میں حکومتِ پنجاب نے 6 تا 8 فروری کو لاہور میں محفوظ بسنت کی مشروط اجازت دی ہے۔
نوٹیفیکیشن میں واضح کیا گیا ہے کہ بسنت کے مقررہ اوقات کے علاوہ پتنگ بازی قانون شکنی ہوگی اور اس کی سخت سزا ہوگی۔ مقررہ تاریخوں سے پہلے یا بعد میں پتنگ بازی پر 5 سال قید اور 20 لاکھ روپے جرمانہ ہو سکتا ہے، جبکہ ممنوعہ مواد کی تیاری یا فروخت میں ملوث افراد کو 7 سال قید اور 50 لاکھ روپے جرمانہ بھی ہو سکتا ہے۔