سٹی42: اسلام آباد ائیرپورٹ پر غیر ملکی ائیر لائن کا طیارہ لینڈنگ کے دوران ہولناک حادثے سے بچ گیا۔
پاکستان ائیرپورٹس اتھارٹی کے ذرائع نے بتایا ہے کہ ائیر ٹریفک کنٹرولرکے بروقت اقدام نے طیارے کو مرمت کے لئے بند کئے جا چکے رن وے پر لینڈنگ کرنے سے روک دیا۔
ذرائع کے مطابق سعودی ائیرلائن کی پرواز نمبر 728 جدہ سے اسلام آباد پہنچی تھی۔ اسلام آباد ائیرپورٹ کا رن وے 28 لیفٹ مرمت کے لیے بند ہے۔ پاکستان ائیرپورٹس اتھارٹی نے رن وے 28 لیفٹ بند ہونے اور رن وے 28 رائٹ کھلے ہونےکا نوٹم جاری کر دیا تھا۔
سعودی ائیرلائن کے پائلٹ نے لینڈنگ اپروچ 28 رائٹ کے بجائے 28 لیفٹ کے بند رن وےکے لئے لینڈِنگ اپروچ بنا لی۔ یہ ایک سنگین غلطی تھی۔ کنٹرول ٹاور پر موجود ائیرٹریفک کنٹرولر نے طیارے کے پائلٹ کو غلط رن وے پر ہونےکا بروقت انتباہ کیا۔
غیر ملکی ائیرلائن کا پائلٹ یہ سمجھتا رہا کہ وہ ٹھیک رن وے پر لینڈِنگ کرنے جا رہا ہے اور یہی بات وہ ائیر ٹریفک کنٹرول کو بھی کہتا رہا کہ وہ ٹھیک رن وے پر ہ جا رہا ہے لیکن ائیرٹریفک کنٹرولر نے عین وقت پر اس طیارے کے پائلٹ کو لینڈنگ کرنے سے روک دیا اور انہیں دوبارہ چکر لگانےکے لئے کہا۔ جب ائیر ٹریفک کنٹرول کسی طیارے کو لینڈِنگ کرنے سے روکتا ہے تو اسے لازماً رکنا پڑتا ہے، دوبارہ چکر لگانے کے لئے کہا جائے تو طریقہ کار کے مطابق پائلٹ کو دوبارہ چکر لگانا پڑتا ہے۔
ذرائع کے مطابق دوسری کوشش میں سعودی ائیرلائن کے بوئنگ 777 طیارے نے درست رن وے پر لینڈکیا۔
ذرائع کے مطابق جس وقت مسافروں سے بھرے طیارے نے 28 لیفٹ پر لینڈنگ اپروچ بنائی اس وقت نیچے زیر مرمت رن وے پر بڑی تعداد میں لوگ کام کر رہے تھے اور گاڑیاں موجود تھیں۔ زیر مرمت رن وے پر لینڈنگ ہو جاتی تو سنگین حادثہ پیش آ جاتا۔
اس وقت بوئنگ 777 طیارے میں سیکڑوں مسافر موجود تھے۔
پاکستان ائیرپورٹس اتھارٹی نے اس واقعےکا نوٹس لے لیا ہے۔