سٹی42: فیڈرل کانسٹیبلری کے 3 بہادر سپوت وطن پر قربان ہو گئے۔ محسن نقوی شہیدوں کے جنازوں کو کندھا دینے کے لئے پشاور پہنچ گئے۔
یہ جوان نائیک صادق حسین، سپاہی عبدالغفار اور سپاہی زیور خان ہنگو کے علاقہ میں فتنہ الہندوستان کے دہشتگردوں کے بزدلانہ حملے میں بہادری کے ساتھ مقابلہ کرتے ہوئے شہید ہوئے۔
وفاقی وزیرداخلہ محسن نقوی پشاور جا کر شہید جوانوں کے جنازہ میں شامل ہوئے۔ جنازہ میں ایف سی کے سینئیر افسروں اور جوانوں کی بڑی تعداد شامل تھی۔ ان جوانوں کا جنازہ پورے فوجی اعزاز کے ساتھ ہوا۔
خیبرپختونخوا کے وزیراعلیٰ علی امین گنڈاپور بھی شہید جوانوں کے جنازہ میں شامل ہوئے۔
وفاقی وزیرداخلہ محسن نقوی نے پشاور میں فیڈرل کانسٹیبلری کے ہیڈ کوارٹر جا کر جام شہادت نوش کرنے والے نائیک صادق حسین، سپاہی عبدالغفار اور سپاہی زیور خان کی قربانی کو خراج عقیدت پیش کیا
وزیرداخلہ محسن نقوی، وزیر اعلی علی امین گنڈاپور، آئی جی خیبرپختونخوا پولیس ذوالفقار حمید ، کمانڈنٹ فیڈرل کانسٹیبلری نذیر گاڑا اور چیف سیکرٹری خیبرپختونخوا نے شہید ہونے والے جوانوں کے جسد خاکی پر پھول رکھے ۔
شہدا کے اہل خانہ سے تعزیت
وزیر داخلہ محسن نقوی نے تینوں شہداء کے پسماندگان سے ملاقات کی اور اس ناقابلِ تلافی نقصان پر ان سے دلی ہمدردی اور تعزیت کا اظہار کیا، شہداء کے درجات کی بلندی کے لئے دعا کی اور شہداء کے لواحقین کو دلاسہ دیا ۔
محسن نقوی اور علی امین گنڈاپور نے شہداء کے جنازوں کو کندھا دیا۔
قربانی ضائع نہیں ہونے دیں گے
محسن نقوی نے تین شہید جوانوں کے جنازہ پر مختصر گفتگو کی اور اعلان کیا کہ جام شہادت نوش کرنے والے جوانوں کی قربانی رائیگاں نہیں جائے گی۔ شہداء کے خاندان ہمارے اپنے خاندان ہیں اور قوم ہمیشہ ان خاندانوں کی مقروض رہے گی۔
زخمی نائب صوبیدار کی عیادت
وفاقی وزیرداخلہ محسن نقوی نے فیڈرل کانسٹیبلری ہسپتال ہسپتال میں زیر علاج زخمی نائب صوبیدار کاشف کی عیادت کی
محسن نقوی نے زخمی نائب صوبیدار کاشف کی خیریت دریافت کی
انہوں نے زخمی نائب صوبیدار کاشف کے بلند عزم اور جذبے کو سراہا
محسن نقوی نے نائب صوبیدار کاشف سے کہا، آپ نے جوانمردی کی لازوال مثال قائم کی اور دشمن کے حملے کو پسپا کیا۔ جس دلیری سے آپ نے بھارتی سپانسرڈ دہشتگردوں کا مقابلہ کیا وہ قابل تحسین ہے۔
محسن نقوی نے کہا، ہم سب آپ کے ساتھ ہیں اور ہمیشہ ساتھ رہیں گے۔
آئی جی خیبرپختونخوا ذوالفقار حمید۔ کمانڈنٹ فیڈرل کانسٹیبلری نذیر گاڑا۔ سول انتظامیہ اور اعلی حکام بھی اس موقع پر موجود تھے۔