ویب ڈیسک:عالمی مارکیٹ میں جمعرات کو سونے کی قیمت میں کمی دیکھی گئی ہے۔
تفصیلات کے مطابق اس کی بنیادی وجہ یہ ے کہ سرمایہ کار امریکی فیڈرل ریزرو کی جانب سے شرح سود میں مزید اضافے کے امکانات کو مدنظر رکھتے ہوئے محتاط رویہ اختیار کیے ہوئے ہیں۔ تاہم عالمی سطح پر تیل کی قیمتوں میں کمی نے سونے کی قیمت کو کسی حد تک سہارا دیا۔
اسپاٹ گولڈ کی قیمت 0.1 فیصد کم ہوکر 4,288.98 ڈالر فی اونس ہوگئی، جبکہ دسمبر کے لیے امریکی گولڈ فیوچرز تقریباً مستحکم رہے اور 4,317.50 ڈالر فی اونس پر ٹریڈ ہوئے۔
وی ٹی مارکیٹ کے چیف اسٹریٹیجی آفیسر راس میکسویل کے مطابق سرمایہ کار گزشتہ ہفتے شرح سود میں اضافے کے بعد فیڈرل ریزرو کے آئندہ فیصلوں، امریکی ڈالر، امریکی ٹریژری ییلڈز اور مشرق وسطیٰ میں تیل و توانائی کی سپلائی سے متعلق صورتحال پر گہری نظر رکھے ہوئے ہیں۔
ان کے مطابق اگر امریکی مرکزی بینک کی جانب سے مزید شرح سود بڑھانے کا واضح عندیہ سامنے آتا ہے تو سونے کی قیمت پر اضافی دباؤ پڑ سکتا ہے۔ اس کی وجہ یہ ہے کہ بلند شرح سود کے ماحول میں ایسی سرمایہ کاری زیادہ پرکشش ہوسکتی ہے جو باقاعدہ منافع یا سود فراہم کرتی ہے، جبکہ سونے سے اس نوعیت کی آمدنی حاصل نہیں ہوتی۔
امریکی فیڈرل ریزرو نے گزشتہ ہفتے بنیادی شرح سود میں 25 بیسس پوائنٹس کا اضافہ کیا تھا، جس کے بعد شرح سود کی حد 3.75 سے 4 فیصد ہوگئی۔ امریکا میں مہنگائی کے دباؤ اور معیشت کی مضبوطی کے پیش نظر رواں سال اکتوبر میں مزید شرح سود بڑھانے کے امکانات بھی زیرِ بحث رہے ہیں۔
دوسری جانب دیگر قیمتی دھاتوں کی قیمتوں میں بھی مختلف رجحان دیکھا گیا۔ چاندی 0.6 فیصد کمی کے بعد 64.07 ڈالر فی اونس، پلاٹینم 0.2 فیصد اضافے کے ساتھ 1,754.05 ڈالر فی اونس جبکہ پیلیڈیم 0.1 فیصد کمی کے بعد 1,260.70 ڈالر فی اونس پر آگیا۔