علی ساہی : پنجاب بھر میں سموگ سے نمٹنے کے لیے ٹریفک پولیس کی کارروائیاں تیز کر دی گئی ہیں۔
ترجمان ٹریفک پولیس کے مطابق ڈی آئی جی ٹریفک پنجاب کی خصوصی ہدایات پر دھواں چھوڑنے والی گاڑیوں کے خلاف وسیع پیمانے پر آپریشن جاری ہے۔
ترجمان کے مطابق گزشتہ 3 ہفتوں کے دوران دھواں چھوڑنے والی گاڑیوں پر 17 کروڑ 49 لاکھ روپے سے زائد کے جرمانے عائد کیے گئے ہیں، جبکہ کارروائیوں میں گزشتہ سال کے مقابلے میں 116 فیصد اضافہ ریکارڈ کیا گیا ہے۔
رواں ماہ کے دوران 87 ہزار سے زائد گاڑیوں کو چالان ٹکٹ جاری کیے گئے، جبکہ 41 گاڑیوں کے فٹنس سرٹیفکیٹس اور 35 سے زائد ماحول دشمن گاڑیوں کے روٹ پرمٹ بھی معطل کر دیے گئے۔
مزید برآں، دھواں چھوڑنے والی 24 گاڑیوں کے خلاف ایف آئی آر کا اندراج کیا گیا ہے جبکہ 13 ہزار سے زائد گاڑیوں کو موقع پر بند کیا گیا۔
ترجمان نے بتایا کہ 5 ہزار سے زائد ریت اور مٹی سے لوڈڈ نان کورڈ گاڑیوں کو بھی بھاری جرمانے کیے گئے ہیں۔
ڈی آئی جی ٹریفک پنجاب نے شہریوں سے اپیل کی ہے کہ وہ اپنی گاڑیوں کی باقاعدہ مینٹیننس کو یقینی بنائیں اور پنجاب کو سموگ فری بنانے کے لیے ٹریفک پولیس کے اقدامات میں تعاون کریں۔