(سٹی 42) سابق وزیراعظم کے صاحبزادے حسین نواز اور داماد کیپٹن ریٹائرڈ صفدر نے نواز شریف کو زہر دینے کا الزام لگا دیا۔

سابق وزیر اعظم میاں محمد نواز شریف کے صاحبزادے حسین نواز نے اپنے ایک ٹویٹ میں لکھا ہے کہ پلیٹ لیٹس کم ہونے کی ایک وجہ زہر بھی ہو سکتی ہے جو ایک یا دوسری صورت میں دیا جا رہا ہو، کسی کو شبے کا فائدہ نہ دیں،اگر میاں صاحب کو کوئی نقصان پہنچا تو آپ جانتے ہیں کون لوگ اس کے ذمہ دار ہوں گے۔

پلیٹلیٹ کم ہونے کی ایک وجہ پوائزننگ(یعنی زہر )بھی ہو سکتی ہے جو ایک یا دوسری صورت میں دیا جا رہا ہو۔کسی کو شبے کا فائدہ نہ دیں،اگر میاں صاحب کو کوئی نقصان پہنچا تو آپ جانتے ہیں کون لوگ اس کے ذمہ دار ہونگے۔ https://t.co/luwVSl5CBh

— Hussain Nawaz Sharif (@Hussain_NSharif) October 21, 2019

انہوں نے اپنے ایک اور ٹویٹ میں کہا  کہ یہ آج کا نہیں بلکہ کافی عرصے سے طے شدہ طبی معاملہ ہے، پلیٹ لیٹس کی کمی کی ایک وجہ زہر دینا بھی ہوسکتی  ہے۔

یہ آج کا نہیں بہت عرصے سے طے شدہ طبی معاملہ ہے کہ پلیٹ لیٹس کی کمی کی ایک وجہ زہر بھی ہو سکتی ہے
THROMBOCYTOPENIA AS A MANIFESTATION OF POISONING https://t.co/QynhE1eMjK

— Hussain Nawaz Sharif (@Hussain_NSharif) October 21, 2019

کیپٹن(ر) صفدر نے بھی مسلم لیگ (ن) کے قائد میاں محمد نوازشریف کو کھانے میں زہر دینے کا الزام لگا دیا، کہتے ہیں کہ انہیں یقین ہے نواز شریف کو کھانے میں زہر دیا گیا، اتنی جلدی پلیٹ لیٹس کا گرنا ثابت کرتا ہے کہ گڑبڑ ہے، نواز شریف کا علاج سرکاری ہسپتال سے کرانے پر خاندان کو سخت تحفظات ہیں،انہیں فوری طور پر کسی نجی ہسپتال منتقل کیا جائے، میرے قائد کو کچھ ہوا تو عمران خان کی خیر نہیں۔

واضح رہے کہ سابق وزیراعظم کو پیر کی شب کو طبیعت ناساز ہونے پر ہنگامی بنیادوں پر لاہور کے سروسز ہسپتال منتقل کیا گیا، جہاں ان کا علاج جاری ہے، نواز شریف کی لیب رپورٹ بھی آگئی ہے،رپورٹ کے مطابق نوازشریف کے پلیٹ لیٹس 16 ہزار سے کم ہو کر 10 ہزار رہ گئے۔