قیصر کھوکھر: وزیراعلیٰ پنجاب کے جیل ریفارمز ایجنڈے کے تحت جیلوں میں کام کرنے والے قیدیوں کو معاوضہ ملنا شروع ہو گیا ہے۔
ڈسٹرکٹ جیل شاہ پور میں قیدیوں کے ہاتھوں تیار کردہ نوروزی چپل مارکیٹ میں فروخت ہو رہی ہے اور اس سے حاصل ہونے والی اجرت قیدیوں کے ذاتی اکاؤنٹس میں جمع کی جاتی ہے۔ ماہرین کی نگرانی میں قیدیوں نے اعلیٰ معیار کی نوروزی چپل تیار کرنا سیکھا ہے، جو خوبصورتی، معیار اور پائیداری کے لحاظ سے منفرد ہیں۔
اس اقدام کا مقصد قیدیوں کو ہنر مند بنانا ہے تاکہ وہ رہائی کے بعد بھی معاشرے کا مفید حصہ بن سکیں۔ عید سے قبل قیدیوں کو ان کی محنت کا صلہ اجرت کی صورت میں دیا گیا۔
پنجاب بھر کی جیلوں میں قیدی مختلف مصنوعات تیار کر رہے ہیں، جن میں اعلیٰ معیار کا فرنیچر، قالین، ہینڈی کرافٹس، برتن، پیپر، ٹائلیں، فینائل، پرفیوم، صابن، ایل ای بلب، ٹشو پیپر، فٹ بال اور دیگر اشیاء شامل ہیں۔
قیدیوں کو موٹر مکینک، حجام، خانساماں، بیوٹیشن اور آئی ٹی کے کورسز کروائے جا رہے ہیں تاکہ وہ اپنی رہائی کے بعد معاشی طور پر خود کفیل بن سکیں۔
ترجمان محکمہ داخلہ پنجاب کے مطابق جیل انڈسٹری اور ہنر مند قیدی جیل ریفارمز کی ایک اعلیٰ مثال ہیں، جو نہ صرف قیدیوں کے لیے مفید ہیں بلکہ یہ معاشرے کے لیے بھی فائدہ مند ثابت ہو رہے ہیں۔