ویب ڈیسک: نارتھ ناظم میں رہائشی عمارت میں سلنڈر دھماکے کے نتیجے میں بچہ جاں بحق اور چار افراد زخمی ہو گئے۔
میڈیا رپورٹس کے مطابق شہر قائد کے علاقے نارتھ ناظم آباد حیدری بلاک جی میں رہائشی عمارت میں سحری کے وقت سلنڈر دھماکا ہوا، جس کی آواز دور دور تک سنی گئی جب کہ نویں منزل کے فلیٹ میں آگ لگ گئی، اور ملحقہ فلیٹ کو بھی لپیٹ میں لے لیا۔
دھماکے کی اطلاع ملتے ہی پولیس انتظامیہ اور ریسکیو ادارے جائے حادثہ پر پہنچ گئے جنہوں نے امدادی سرگرمیاں شروع کر دی گئیں۔
سلنڈر دھماکے کے نتیجے میں سات سالہ بچہ جاں بحق ہوا، جس کی لاش ریسکیو عملے نے ملبے سے نکال لی جب کہ خاتون اور بچی سمیت چار افراد زخمی ہو گئے جنہیں اسپتال منتقل کر دیا گیا۔
ریسکیو حکام کے مطابق جاں بحق لڑکے کی شناخت 15 سالہ برہان کے نام سے ہوئی جب کہ زخمیوں میں 30 سالہ فاطمہ، 4 سالہ انیسہ، 40 سالہ ہنید اور 70 سالہ تسنیم شامل ہیں۔
دھماکا ہوتے ہی قریبی علاقوں کے لوگ جائے حادثہ پر پہنچے جب کہ متاثرہ عمارت کے دیگر مکینوں میں شدید خوف وہراس پھیل گیا اور وہ اپنے فلیٹ سے نکل کر باہر آ گئے۔
دوسری جانب فائر بریگیڈ کے ساتھ اسنارکل نہ ہونے کی وجہ سے نویں منزل پر فلیٹ میں لگی آگ کو بجھانے کے لیے پانی پہنچانے میں دشواریوں کا سامنا کرنا پڑا، جس کے باعث آگ سے متاثرہ فلیٹ کا بیرونی حصہ شدید متاثر ہوا جب کہ آگ کی لپیٹ میں آ کر دسویں منزل کے چاروں فلیٹس بھی متاثر ہوئے۔
کئی گھنٹوں کی کوششوں کے بعد آگ پر قابو پایا گیا اور عمارت میں کولنگ اور سرچنگ آپریشن مکمل کر کے رہائشیوں کو ان کے فلیٹوں میں جانے کی اجازت دی گئی۔
پولیس کا کہنا ہے کہ ابتدائی طور پر دھماکا گیس لیکیج کے باعث ہوا جب کہ اس حوالے سے مزید تفتیش جاری ہے جبکہ عینی شاہدین کا کہنا ہے کہ آگ سحری کے وقت لگی اور دھماکے کی آواز دور دور تک سنی گئی۔
ریسکیو حکام کہتے ہیں کہ عمارت میں گیس کی فراہمی نہیں تھی اور رہائشی سلنڈر استعمال کرتے تھے۔ عمارت سے دو تباہ شدہ سلنڈر بھی ملے ہیں۔
ڈی سی سینٹرل طہٰ سلیم نے بتایا کہ ایس بی سی اے کی ٹیم کو طلب کر لیا گیا ہے اور ٹیکنیکل ٹیم کی کلیئرنس کے بعد ہی مکینوں کو اندر جانے کی اجازت دی جائے گی۔ ایس ایس پی سینٹرل عمران خان نے بتایا کہ مجموعی طور پر دو فلیٹس متاثر ہوئے ہیں۔
واضح رہے کہ اس سے قبل یکم رمضان کو سولجر بازار کی رہائشی عمارت میں سحری کے وقت گیس لیکیج دھماکے کے نتیجے میں پوری عمارت منہدم ہو گئی تھی اور 15 افراد اپنی جان سے گئے تھے۔