ویب ڈیسک: جاپان کی معروف ٹوکیو یونیورسٹی نے ADB-جاپان اسکالرشپ پروگرام 2026 کے لیے درخواستیں قبول کرنا شروع کر دی ہیں، جس سے پاکستانی طلبہ کے لیے دنیا کی بہترین جامعات میں اعلیٰ تعلیم حاصل کرنے کا سنہری موقع میسر آگیا ہے۔
یہ اسکالرشپ ایشیائی ترقیاتی بینک (ADB) کی جانب سے فراہم کی جاتی ہے اور پاکستان سمیت ADB کے رکن ممالک کے طلبہ اس کے لیے درخواست دینے کے اہل ہیں۔
یہ اسکالرشپ مکمل طور پر فنڈڈ ہے، جس کے تحت ماسٹرز پروگرام کے منتخب امیدواروں کو ٹیوشن فیس کی مکمل معافی، ماہانہ وظیفہ، ریسرچ یا تھیسس کے لیے گرانٹ، سفری اخراجات، طبی انشورنس اور دیگر سہولیات فراہم کی جاتی ہیں، تاکہ بین الاقوامی طلبہ کو مالی مسائل کے بغیر اعلیٰ تعلیم جاری رکھنے میں مدد مل سکے۔
کون سے طلباء اہل ہیں؟
اس اسکالرشپ کے لیے درخواست دینے والے امیدوار کا تعلق ADB کے قرض لینے والے رکن ملک، جیسے پاکستان، سے ہونا لازمی ہے۔ امیدوار کے پاس کسی تسلیم شدہ ادارے سے بیچلر ڈگری ہونی چاہیے، جبکہ متعلقہ فیلڈ میں کم از کم دو سال کا فل ٹائم تجربہ بھی درکار ہے۔ درخواست کے وقت امیدوار کی عمر 35 سال سے کم ہونی چاہیے اور اسے تعلیم مکمل ہونے کےبعد کم از کم دو سال اپنے ملک میں کام کرنا ہوگا۔اسکالرشپ ان طلبہ کے لیے نہیں ہے جو پہلے سے ماسٹرز ڈگری رکھتے ہیں اور پی ایچ ڈی کے خواہشمند طلبہ کے لیے MEXT اسکالرشپ تجویز کی جاتی ہے۔
اہم دستاویزات کون سی درکار ہیں؟
اسکالرشپ کے خواہشمند طلباء کو گریجویٹ اسکول آف فرنٹیئر سائنسز (GSFS) کا درخواست فارم، تعلیمی اسناد اور ٹرانسکرپٹس، تحقیق و مطالعہ کا منصوبہ (ریسرچ اینڈ اسٹڈی پلان) اور ڈگری سرٹیفکیٹ جمع کرانا ہوگا۔ مزید برآں، دو سفارش نامے براہ راست یونیورسٹی کو اس عنوان کے ساتھ ارسال کیے جائیں گے:
“ADB recommendation letter_Applicant Name”
تمام دستاویزات (سفارش ناموں کے علاوہ) یونیورسٹی کے فراہم کردہ سرکاری گوگل فارم کے ذریعے 10 دسمبر 2025 تک جمع کرانا ضروری ہیں۔
سپروائزر کی تلاش کا لازمی مرحلہ کیسے حل کرنا ہے؟
درخواست دینے سے قبل امیدواروں کو GSFS کے متعلقہ شعبوں میں سے زیادہ سے زیادہ پانچ ممکنہ سپروائزرز کی نشاندہی کرنی ہوگی اور انہیں درخواست میں شامل کرنے سے پہلے رابطہ کرنا لازمی ہے۔ دستیاب شعبوں میں نیچرل انوائرمنٹل اسٹڈیز، اوشن ٹیکنالوجی و ماحولیات، ہیومن اینڈ انجینئرڈ انوائرمنٹل اسٹڈیز، انٹرنیشنل اسٹڈیز اور گریجویٹ پروگرام ان سسٹین ایبلیٹی سائنس (GPSS) شامل ہیں۔
اسکالرشپ سے متعلق اہم تاریخیں کون سی ہیں؟
درخواست جمع کرانے کی آخری تاریخ: 10 دسمبر 2025,پہلی اسکریننگ کا نتیجہ: فروری 2026,اصل دستاویزات جمع کرانے کی آخری تاریخ: 20 مارچ 2026,حتمی انتخاب: مئی 2026,کلاسز کا آغاز: 1 اکتوبر 2026
پاکستان ہائر ایجوکیشن کمیشن (HEC) اور بین الاقوامی اسکالرشپ ماہرین نے پاکستانی نوجوانوں کو اس موقع سے بھرپور فائدہ اٹھانے کی ترغیب دیتے ہوئے کہا ہے کہ یہ پروگرام عالمی معیار کی تعلیم اور پائیدار ترقی کے شعبوں میں قائدانہ کردار ادا کرنے کا زبردست موقع فراہم کرتا ہے۔