ویب ڈیسک: کراچی میں خاتون ڈرائیور کی گاڑی کی ٹکر سے 2 افراد جاں بحق جبکہ 5 افراد زخمی ہوگئے.
پولیس کے مطابق مقدمہ متوفی عارف کے بھائی کی مدعیت میں بہادر آباد تھانے میں درج کیا گیا۔
پولیس کے مطابق حادثے میں گاڑی چلانے والی خاتون کی شناخت نتاشا کے نام سے ہوئی ہے حادثے میں خاتون ڈرائیور بھی زخمی ہے، ملزمہ کو سر پر چوٹ لگی ہے جن کا جناح ہسپتال میں سی ٹی اسکین کیا جارہا ہے۔پولیس کا کہنا ہے کہ ٹریفک حادثے میں باپ بیٹی جاں بحق اور 5 افراد زخمی ہوئے, 4 افراد معمولی زخمی ہوئے جبکہ ایک شخص کی حالت تشویشناک ہے۔
خیال رہے کہ کارساز کے علاقے میں اسٹیڈیم کے قریب خاتون ڈرائیور نے تیز رفتار گاڑی موٹر سائیکل سواروں پر چڑھا دی۔ حادثے میں خاتون کی گاڑی بھی اُلٹ گئی جس کے بعد مشتعل ہجوم نے اُس کا گھیراؤ کرنا چاہا لیکن پولیس اور رینجرز نے خاتون کو حراست میں لے لیا۔
اس حوالے سے عینی شاہدین نے بتایا کہ گاڑی چلانے والی خاتون اپنے حواس میں نہیں تھی۔ پولیس کے مطابق نشہ کرکے گاڑی چلانے کی تصدیق کے لیے زیر حراست خاتون کا جناح ہسپتال میں طبی معائنہ کروایا جا رہا ہے، خاتون کے میڈیکل رپورٹ کی روشنی میں قانونی کارروائی آگے بڑھائی جائے گی۔
واضح رہے کہ حادثے میں گاڑی چلانے والی خاتون نتاشا معروف تاجر دانش اقبال کی اہلیہ ہیں۔پولیس کا کہنا ہے کہ خاتون ذہنی دباؤ میں ہے اور اس کے پاس برطانوی ڈرائیونگ لائسنس ہے۔