سٹی42: پی ٹی آئی کے اندر  اکثریت عمران خان کے ساتھ نہیں رہی۔ پی ٹی آئی کے اندر عمران کی مقبولیت کا سورج غروب ہو چکا ہے۔  اب وہ اپنی پارٹی کے اندر لیڈر نہیں رہے۔
 یہ تجزیہ  پیپلزپارٹی پنجاب کے سینئیر رہنما حسن مرتضیٰ کا  ہے۔

حسن مرتضیٰ نے کہا، "پی ٹی آئی کی اکثریت بانی پی ٹی آئی کے ساتھ نہیں اور عہدوں کی بندر بانٹ میں لگی ہوئی ہے ۔ "

 24 نیوز ایچ ڈی کے پروگرام میں پی ٹی آئی کی صورتحال پر بات کرتے ہوئے پیپلز پارٹی کے سینیئر رہنما حسن مرتضیٰ نے کہا کہ پی ٹی آئی کی اکثریت بانی کے ساتھ نہیں ہے اور نہ ہی وہ ان کی رہائی چاہتے ہیں۔

حسن مرتضیٰ نے کہا،  "بانی" پر بھروسہ کرنا مشکل ہے کیونکہ وہ "یو ٹرن" کو اچھا سمجھتے ہیں۔  جو لوگ ان سے مل کے آتے ہیں وہ الگ الگ بیان دیتے ہیں۔

 دوسری جانب رہنما تحریک انصاف اظہر صدیق نے کہا کہ کم لوگوں کو بانی سے ملنے دیا جاتا ہے جس کی وجہ سے ان کی بات کی تصدیق مشکل ہے،اس کے علاوہ ان کا کہنا تھا جماعت میں رابطوں میں شدید مشکلا ت ہیں۔

 پروگرام میں شریک مسلم لیگ ن کے رہنما نہال ہاشمی  نے کہا، پی ٹی آئی ایک کلٹ ہے اس لیے وہ اپوزیشن کا کردار ٹھیک طو ر سے ادا نہیں کر رہی۔انہوں نے مزید بتایا کہ تحریک انصاف دوسری جماعتوں پر بھروسہ نہیں کرتی جس کی وجہ سے وہ اکیلی ہے۔