سٹی42: ڈولفن اسکواڈ اور پولیس ریسپانس یونٹ (پی آر یو) کی ہفتہ وار کارکردگی رپورٹ جاری کر دی گئی ہے، جس کے مطابق شہر بھر میں جرائم کے خلاف مؤثر کارروائیاں کرتے ہوئے متعدد ملزمان کو گرفتار کیا گیا ہے۔

ایس پی ڈولفن کے مطابق ڈکیتی اور چوری کی وارداتوں میں ملوث 13 ملزمان کو گرفتار کیا گیا، جن کے قبضے سے ایک موٹر سائیکل، دو موبائل فون اور 3 لاکھ 30 ہزار روپے سے زائد نقدی برآمد ہوئی۔ رپورٹ کے مطابق ڈولفن اسکواڈ نے کارروائیوں کے دوران 13 خطرناک ڈکیت گینگز کو بھی گرفتار کیا۔

پولیس حکام کا کہنا ہے کہ دورانِ پٹرولنگ 59 اشتہاری ملزمان سمیت 593 عادی مجرمان اور 39 عدالتی مفروروں کو گرفتار کیا گیا۔ ملزمان کے قبضے سے 15 پستول، 4 رائفلیں، درجنوں گولیاں اور میگزینز برآمد کیے گئے۔

ترجمان ڈولفن کے مطابق منشیات فروشوں کے خلاف کارروائی کرتے ہوئے 6 بوتلیں شراب، چرس اور آئس بھی برآمد کی گئی۔ اس کے علاوہ 82 مشکوک گاڑیاں اور موٹر سائیکلیں تھانوں میں بند کی گئیں جبکہ 789 افراد کے خلاف مختلف قانونی کارروائیاں کی گئیں۔

ایس پی ڈولفن نے بتایا کہ ون ویلنگ میں ملوث 54، پتنگ بازی کے 11 اور ہوائی فائرنگ میں ملوث ملزمان کو بھی گرفتار کیا گیا۔ کمیونٹی پولیسنگ کے تحت مختلف واقعات میں 77 سے زائد افراد کو ریسکیو کیا گیا۔