ویب ڈیسک: لاہور میں بسنت کی تقریبات کے لیے انتظامی تیاریاں تیز ہو گئی ہیں، تاہم ضلعی انتظامیہ نے پتنگ اور ڈور کے سرکاری نرخ مقرر نہ کرنے کا فیصلہ کیا ہے، جبکہ بسنت کے موقع پر شہر میں 4 چھٹیوں کے امکان پر بھی غور کیا جا رہا ہے۔
لاہور میں بسنت کی تقریبات کے لیے انتظامی تیاریاں زور و شور سے جاری ہیں، تاہم ضلعی انتظامیہ نے پتنگ اور ڈور کے سرکاری نرخ مقرر نہ کرنے کا فیصلہ کیا ہے۔ انتظامیہ کے مطابق پتنگ فروشوں کے خلاف کارروائیاں صرف مقررہ سائز اور ممنوعہ مواد کے استعمال تک محدود رہیں گی اور دکاندار اپنی مرضی کے مطابق قیمتیں طے کر سکیں گے۔
ذرائع کے مطابق پتنگ کی قیمتیں 150 سے 270 روپے تک جبکہ ڈور کا پنا 2200 سے 2500 روپے تک فروخت ہونے کا امکان ہے۔ مینوفیکچررز کا کہنا ہے کہ طلب میں اضافے کے باعث قیمتوں میں مزید اضافہ بھی ہو سکتا ہے۔ ضلعی انتظامیہ کے افسران نے بتایا کہ آئندہ سال بسنت کے موقع پر قیمتوں کے تعین کے لیے باقاعدہ ورکنگ کی جائے گی اور رجسٹرڈ دکاندار بچا ہوا اسٹاک لازمی طور پر ڈکلیئر کریں گے۔
دسری جانب ذرائع کے مطابق بسنت کے موقع پر لاہور میں 4 چھٹیوں کے امکان پر غور کیا جا رہا ہے۔ 5 فروری کو کشمیر ڈے کی چھٹی پہلے سے طے ہے جبکہ جمعہ کی چھٹی بھی زیرِ غور ہے، جس کے بعد شہریوں کو جمعرات، جمعہ، ہفتہ اور اتوار کی مسلسل چھٹیاں مل سکتی ہیں۔ اس سلسلے میں انتظامیہ کا کہنا ہے کہ چھٹیوں کا مقصد بسنت کو یادگار اور محفوظ بنانا ہے اور ٹریفک کے دباؤ کو کم کرنا ہے۔
خیال رہے کہ شہر میں 6، 7 اور 8 فروری کو بسنت منانے کا اعلان کیا گیا ہے، جس میں شہریوں کی بڑی تعداد شرکت کرتی ہے۔