کلیم اختر: فیڈرل بورڈ آف ریونیو (ایف بی آر) نے ان لینڈ ریونیو سروس (آئی آر ایس) کے افسران کو اضافی چارج دینے کا باقاعدہ نوٹیفکیشن جاری کر دیا ہے.

 جس کے تحت متعدد افسران کو تین ماہ کے لیے اضافی ذمہ داریاں سونپی گئی ہیں۔

نوٹیفکیشن کے مطابق یہ اضافی چارج مستقل افسران کی تعیناتی تک یا زیادہ سے زیادہ تین ماہ کے لیے نافذ العمل رہے گا، جو بھی مدت پہلے مکمل ہو جائے۔ اس فیصلے کے تحت گریڈ 21 اور 20 کے کئی سینئر افسران کو اہم عہدوں کا اضافی چارج تفویض کیا گیا ہے۔

ایف بی آر کے مطابق چیف انویسٹی گیٹر ٹیکس فراڈ انویسٹی گیشن ونگ، ڈائریکٹر آئی آر ایس اکیڈمی اور مختلف کمشنرز کے عہدوں پر افسران کو اضافی ذمہ داریاں دی گئی ہیں۔ لاہور سمیت مختلف شہروں میں تعینات افسران کو بھی اضافی چارج سونپا گیا ہے۔

نوٹیفکیشن میں بتایا گیا ہے کہ ریفنڈز، ودہولڈنگ ٹیکس، اپیلز، زونل دفاتر اور ٹریک اینڈ ٹریس سسٹم سے متعلق مختلف عہدوں پر بھی اضافی چارجز دیے گئے ہیں، جبکہ ٹریک اینڈ ٹریس سسٹم کے پروجیکٹ ڈائریکٹر کا اضافی چارج بھی تفویض کر دیا گیا ہے۔

اس کے علاوہ آئی ٹی اینڈ ڈی ٹی، پی آر اے ایل اور ایف بی آر ہیڈکوارٹرز میں تعینات افسران بھی اضافی ذمہ داریاں نبھائیں گے۔ ایف بی آر حکام کے مطابق اس اقدام سے انتظامی امور، ٹیکس وصولی اور مجموعی دفتری کارکردگی کو مزید بہتر بنانا ممکن ہو سکے گا۔