شاہد سپراء: وفاقی حکومت نے ملک بھر سے بجلی کی لوڈشیڈنگ ختم کرنے کی منصوبہ بندی شروع کر دی، بجلی کی طلب بڑھانے اور پاور سیکٹر میں اصلاحات کے لئے قومی ٹاسک فورس قائم کر کے اہداف مقرر کر دیئے گئے.
تفصیلات کےمطابق لوڈمینجمنٹ اور لوڈشیڈنگ کے خاتمے اور پاور سیکٹر کی اصلاحات کے لئے قومی ٹاسک فورس قائم کر دی گئی، ٹاسک فورس میں لیسکو، این پی سی سی، سی پی پی اے سمیت دیگر اداروں کے نمائندگان کو شامل کیا گیا۔
قومی ٹاسک فورس نے لوڈشیڈنگ کے خاتمے کے لئے کمپنیوں کو خصوصی ٹاسک دے دیا، ٹاسک فورس کو بجلی کی کھپت کو بڑھانے کے لئے ٹھوس اقدامات اٹھانے کا ہدف دیدیا گیا۔
زائد لوڈ پر چلنے والے فیڈرز کا لوڈ تقسیم کر کے سسٹم کو مستحکم کرنے کی ہدایت کر دی گئی، تنگ گلیوں اور بازاروں میں ناقص بجلی کی تاروں کو تبدیل کرنے کا ہدف بھی مقرر کر دیا گیا۔
تاروں کی تبدیلی کی وجہ سے لائن لاسز میں کمی جبکہ بلاتعطل فراہمی کی جا سکے گی، سٹاف کی کمی کو پورا کرنے کے لئے مناسب حکمت عملی مرتب کرنے کا ٹاسک دیا گیا۔
شکایات کے اندراج اور ازالہ کے لئے آن لائن کمپلینٹ سینٹر قائم کرنے کا ہدف دیا گیا، سمارٹ میٹرز کی تنصیب سمیت جدید کیبل لگانے کا ہدف بھی لیسکو کو دے دیا گیا۔