ویب ڈیسک: وزیراعظم شہباز شریف اور آذربائیجان کے صدر الہام علیوف کے درمیان اہم رابطہ ہوا جس میں دوطرفہ تعلقات، مسئلہ کشمیر، علاقائی کشیدگی اور امن کے امور پر تفصیلی تبادلہ خیال کیا گیا۔
وزیراعظم نے جنوبی ایشیا کے حالیہ بحران میں پاکستان کے ساتھ آذربائیجان کی حمایت پر صدر الہام علیوف کا شکریہ ادا کیا۔ انہوں نے کہا کہ صدر علیوف کی مستقل حمایت آذربائیجان کے عوام کی پاکستان سے بے پناہ محبت کا مظہر ہے۔
وزیراعظم شہباز شریف نے اس موقع پر کہا کہ دونوں ممالک کے درمیان گہری دوستی اور بھائی چارے کا رشتہ ہے جو ہر مشکل وقت میں ایک دوسرے کے شانہ بشانہ کھڑے رہے ہیں۔
وزیراعظم نے زور دیا کہ پاکستان نے علاقائی امن کو مدنظر رکھتے ہوئے بھارت کے ساتھ جنگ بندی پر اتفاق کیا ہے اور اسے برقرار رکھنے کے لیے پُرعزم ہے، تاہم بھارتی قیادت کے حالیہ اشتعال انگیز بیانات پر شدید تشویش ہے۔ انہوں نے واضح کیا کہ پاکستان اپنی خودمختاری اور علاقائی سالمیت کے تحفظ کے لیے ہر ممکن اقدام کرے گا۔
صدر الہام علیوف نے بھی پاکستان کی حالیہ سفارتی کامیابیوں پر وزیراعظم کو مبارکباد دی اور علاقائی امن کے فروغ کے لیے پاکستان کی کوششوں کو سراہا۔ انہوں نے کہا کہ آذربائیجان پاکستان کے ساتھ تمام شعبوں میں تعلقات کو مزید مستحکم بنانے کا خواہاں ہے۔
وزیراعظم نے مسئلہ کشمیر پر آذربائیجان کی مسلسل حمایت پر خصوصی شکریہ ادا کیا اور کہا کہ پاکستان اور آذربائیجان کے تعلقات وقت کی ہر آزمائش پر پورے اترے ہیں۔ انہوں نے پاکستان میں آذربائیجان کی دو ارب ڈالر کی سرمایہ کاری میں پیشرفت پر اطمینان کا اظہار کیا اور صدر الہام علیوف کو دورہ پاکستان کی دعوت بھی دی۔