شاہدسپرا:سوئی ناردرن گیس کمپنی تین ماہ گزرنے کے باوجود میٹریل بحران پر قابو پانے میں ناکام رہی ہے، جس کے باعث گھریلو صارفین کے ایل این جی کنکشنز التواء کا شکار ہو گئے ہیں۔
کمپنی کی جانب سے ارجنٹ کیٹیگری میں دیمانڈ نوٹسز کی ادائیگی کے باوجود تین ماہ تک میٹر نصب نہ ہو سکے، جس سے وفاقی حکومت کا ایل این جی پر کنکشن دینے کا منصوبہ بھی متاثر ہوا ہے۔ صارفین نے نومبر میں کروڑوں روپے کے دیمانڈ نوٹس جمع کرائے، لیکن کمپنی کے پاس میٹرز کی تنصیب کے لیے ضروری سٹاک موجود نہ تھا۔
گھریلو کنکشنز پر پابندی ختم ہونے کے بعد لاکھوں درخواستیں جمع کروائی گئیں، جس کے بعد دیمانڈ نوٹسز کا اجرا ہوا، لیکن میٹریل کی کمی کے باعث تنصیب کا عمل تعطل کا شکار رہا۔صارفین نے خدشہ ظاہر کیا ہے کہ میٹریل کی قلت جاری رہی تو گھریلو صارفین کو ایل این جی کنکشن کی فراہمی مزید تاخیر کا شکار ہوگی۔
حکام کا کہنا ہے کہ صورتحال پر قابو پانے کے لیے میٹرز کی فوری فراہمی اور سٹاک میں اضافہ ضروری ہے تاکہ صارفین کو مطلوبہ سہولت بروقت فراہم کی جا سکے۔