ویب ڈیسک : کوئٹہ کی تاریخ میں پہلی بار سرکاری آسامیوں پر ایک ہی روز میں آن لائن ٹیسٹ اور ایک گھنٹے کے اندر تقرری لیٹر کا اجراء کردیا گیا۔
بلوچستان کی تاریخ میں پہلی بار محکمہ خزانہ میں 111 سرکاری آسامیوں پر میرٹ کی بنیاد پر بھرتیاں شروع کر دی گئی ہیں۔ بلوچستان کے وزیراعلیٰ سرفراز بگٹی نے کہا ہے کہ یہ اقدام میرٹ کی بالادستی اور شفافیت کے اصولوں کو یقینی بنانے کی طرف ایک اہم سنگ میل ہے۔
حکام کے مطابق بھرتیاں پیپرلیس اور آن لائن بنیادوں پر کی جا رہی ہیں، امیدواروں سے آن لائن ٹیسٹ لیا جائے گا تاکہ ان کی قابلیت کی شفاف جانچ کی جا سکے۔ کامیاب امیدواروں کو صرف ایک گھنٹے کے اندر تقرری لیٹر جاری کیا جائے گا۔
وزیراعلیٰ سرفراز بگٹی نے کہا کہ اصلاحاتی نظام کا آغاز محکمہ خزانہ سے کیا گیا ہے اور یہ مرحلہ وار تمام سرکاری نوکریوں پر نافذ کیا جائے گا۔انہوں نے کہا کہ عوام سے کیے گئے وعدے کے مطابق نہ نوکریاں بیچی جائیں گی اور نہ ہی کرپشن یا اقرباپروری برداشت کی جائے گی۔ میرٹ، شفافیت اور عوام سے کیے گئے وعدے ہی ہماری حکمرانی کی بنیاد ہیں، اور اسی وعدے کی تکمیل کے لیے شفافیت کے نظام کو مزید مضبوط بنایا جا رہا ہے۔
یہ اقدام بلوچستان میں سرکاری بھرتیوں میں میرٹ اور شفافیت کے فروغ کے لیے ایک تاریخی پیش رفت ہے۔