سٹی42: خیبر پختونخوا میں ضلع باجوڑ میں خوارجی دہشتگردوں کے خلاف حتمی کارروائی میں قانون نافذ کرنے والے اداروں سے تعاون کرتے ہوئے قانون کا احترام کرنے والے ہزاروں شہریوں کی نقل مکانی جاری ہے۔ باجوڑ میں خوارجی دہشتگردوں کیخلاف کارروائی میں تعاون کرتے ہوئے نقل مکانی کرنے والے شہریوں کو عارضی طور پر ٹھہرانے کے لئے ، متاثرین کیلئے کیمپ قائم کئے گئے ہیں۔ حکومت کی جانب سے تمام نقل مکانی کرنے والے شہریوں کوضروری اخراجات کے لئے نقد رقوم بھی فراہم کی جا رہی ہیں۔
ذمہ دار صحافتی ذرائع کے مطابق کمشنر مالاکنڈ ڈویژن نے بتایا ہے کہ 85 سرکاری و نجی تعلیمی اداروں میں 6 ہزار607 افراد مقیم ہیں اور متاثرہ خاندانوں کی مجموعی تعداد 991 ہے: —
خیبرپختونخوا کے ضلع باجوڑ کی تحصیل ماموند میں دہشتگردوں کےخلاف کاررواِئیوں کے دوران قانون نافذ کرنے والے اداروں سے تعاون کرتے ہوئے مختلف علاقوں سے لوگوں کی نقل مکانی جاری ہے۔
ضلعی انتظامیہ نے متاثرین کیلئے مختلف سرکاری اسکولوں میں رہائش کی خصوصی انتظامات کیے ہیں۔ ڈمہ ڈولہ، انعام خورو چینہ گئی اور چوہترہ سے نقل مکانی کرنے والے متاثرین کے کیمپ قائم کر دیا گیا ہے۔
ضلعی انتظامیہ نے متاثرین کو بسوں کے ذریعے سرکاری وپرائیویٹ اسکولوں اور باجوڑ اسپورٹس کمپلکس میں پہنچانے کے انتظامات کیے ہیں۔
صوبائی حکومت کے مطابق متاثرہ علاقوں سے نقل مکانی کرنے والے فی خاندان کو 50،50 ہزار روپے دیے جائیں گے جبکہ ٹارگٹڈ کارروائی مکمل ہونے کے بعد متاثرہ ہر خاندان کو مزید 25، 25 ہزار روپے دیے جائیں گے۔
ایڈیشنل ڈپٹی کمشنرفنانس اینڈ پلاننگ سعید اللہ جان نے کہا ہے کہ اب تک 20 ہزارسے زائد خاندان نقل مکانی کرچکے ہیں جس میں زیادہ تر لوگ اپنے رشتہ داروں کے گھروں میں مقیم ہیں۔
انہوں نے بتایاکہ اب تک85 سرکاری و پرائیویٹ اسکولوں اور اسپورٹس کمپلکس میں 1325 خاندانوں کیلئے کیمپ قائم کیا گیا ہے جہاں ان کو کھانے پینے کی اشیا سمیت دیگر ضروری سامان فراہم کیا جا رہا ہے۔
دوسری جانب باجوڑ میں عارضی طور پر بےگھر ہونے والے خاندانوں کےاعداد و شمار بھی جاری کردیے گئے۔
کمشنرمالاکنڈ ڈویژن کے مطابق 85 سرکاری و نجی تعلیمی اداروں میں 6 ہزار607 افراد مقیم ہیں اور متاثرہ خاندانوں کی مجموعی تعداد 991 ہے۔
ان کا کہنا ہے کہ متاثرہ خاندانوں میں1497مرد، 1552 خواتین اور 3558 بچے شامل ہیں، سپورٹس اسٹیڈیم کیمپ میں 334 متاثرہ خاندان کے 2497 افراد موجود ہیں۔