ویب ڈیسک: سینئر سیاستدان فواد چوہدری نے کہا ہے کہ بشریٰ بی بی یاسمین راشد سمیت 70 سال عمر کے تمام سیاسی قیدی رہا کیے جائیں۔

نجی ٹی وی کے مطابق سابق وفاقی وزیر اور سینئر سیاستدان فواد چوہدری نے اپوزیشن سے مذاکرات کے لیے ماحول بہتر بنانے، جیل میں قید بشریٰ بی بی، یاسمین راشد سمیت 70 سال عمر کے تمام سیاسی قیدیوں کو رہا کرنے کا مطالبہ کیا ہے۔

لاہور میں فواد چوہدری نے میڈیا سے گفتگو کرتے ہوئے کہا کہ لڑائی حکومت اور پی ٹی آئی کی ہے، لیکن نقصان عوام کا ہو رہا ہے۔ حکومت پاکستان کے سروے کے مطابق ملک میں 30 فیصد لوگ تین وقت کا کھانا نہیں کھا سکتے اور روزمرہ کی اشیائے ضروریہ کی قیمتوں میں 200 فیصد تک اضافہ ہو چکا ہے۔

ان کا کہنا تھا کہ ہم جیسے لوگ بار بار مذاکرات کی بات اور لوگوں کو قریب لانے کی کوشش کر رہے ہیں۔ ہم چاہتے ہیں کہ حکومت میں شامل لوگ اونر شپ لیں ہم پی ٹی آئی کے پرانے دوستوں سے مل رہے ہیں تاکہ درجہ حرارت نیچے لایا جائے۔ اگر ایسا نہ ہوا تو ملک افغانستان بن جائے گا۔

فواد چوہدری نے کہا کہ حکوت کو روز ایک تماشا چاہیے جب کہ اپوزیشن بھی کوئی سنجیدہ بات نہیں کرتی۔ بیرسٹر گوہر نے چیئرمین پی ٹی آئی کا عہدہ سنبھالا ہے تو تھوڑی ہمت بھی دکھائیں۔

سابق وفاقی وزیر نے یہ بھی کہا کہ ابھی تک وزیر اعلیٰ کے پی نے بہت ذمہ داری کا مظاہرہ کیا، لیکن دوسری طرف سے ان کے لیے جو بیان آیا، وہ افسوسناک ہے۔