ویب ڈیسک: بینظیر انکم سپورٹ پروگرام (بی آئی ایس پی) نے مستحق خاندانوں کے لیے ایک اہم سہولت کا اعلان کر دیا ہے۔ پروگرام کے تحت اہل بینیفیشریز کو سوشل پروٹیکشن والٹ کے نظام میں شامل کرنے کے لیے مفت موبائل سم فراہم کی جا رہی ہے، تاکہ 8171 سے ادائیگیوں اور دیگر اہم معلومات کے پیغامات براہِ راست اور محفوظ طریقے سے موصول ہو سکیں۔

بی آئی ایس پی کے ترجمان کے مطابق اہل افراد اصل قومی شناختی کارڈ اور موبائل فون کے ساتھ قریبی بی آئی ایس پی کیمپ سائٹ یا دفتر جا کر اس سہولت سے فائدہ اٹھا سکتے ہیں۔ وہاں اسکریننگ کے بعد اہل قرار پانے والے افراد کو ٹوکن جاری کیا جائے گا، جس کے بعد سم اجرا کاؤنٹر پر بائیومیٹرک تصدیق مکمل ہونے پر سم فوری طور پر ایکٹیو کر دی جائے گی۔

بی آئی ایس پی نے ہدایت کی ہے کہ سم صرف ذاتی استعمال میں رکھی جائے، کسی اور کو نہ دی جائے اور اسے ہر وقت آن رکھا جائے تاکہ تمام اہم پیغامات بروقت موصول ہوتے رہیں۔

چیئرپرسن بی آئی ایس پی سینیٹر روبینہ خالد کے مطابق سوشل پروٹیکشن والٹ کا مقصد ادائیگیوں کے نظام کو مزید شفاف اور آسان بنانا ہے۔ انہوں نے بتایا کہ رجسٹرڈ خواتین میں مفت سم کارڈز کی تقسیم شروع کر دی گئی ہے اور مستقبل میں تمام مالی امداد اسی سسٹم کے ذریعے منتقل کی جائے گی۔

سینیٹر روبینہ خالد نے واضح کیا کہ سم بالکل مفت ہے اور اس کے لیے کسی قسم کی رقم ادا نہ کی جائے۔