کلیم اختر:کیو آر کوڈ اور راست ڈیجیٹل ادائیگی کے نظام پر عملدرآمد نہ ہونے سے پنجاب ریونیو اتھارٹی (پی آر اے) کے شفافیت کے دعوے سوالیہ نشان بن گئے ہیں۔
پی آر اے اپنے ہی جاری کردہ نوٹیفکیشن پر بروقت عملدرآمد کروانے میں ناکام دکھائی دے رہی ہے، جس کے باعث صوبے بھر کے متعدد کاروباری ادارے تاحال ڈیجیٹل ادائیگی کی سہولت سے محروم ہیں۔
ذرائع کے مطابق پنجاب بھر میں سینکڑوں ریسٹورنٹس، ہوٹلز اور بیوٹی پارلرز میں کیو آر کوڈ اور کیش لیس ادائیگی کا نظام ابھی تک فعال نہیں ہو سکا۔ ڈیجیٹل ادائیگی کے نفاذ کے لیے دی گئی دو ہفتے کی ڈیڈ لائن گزرنے کے باوجود صارفین کو اب بھی نقد ادائیگی پر مجبور کیا جا رہا ہے۔
پی آر اے کی جانب سے جاری ہدایات کو نظرانداز کیے جانے پر مانیٹرنگ کا مؤثر نظام بھی سوالات کی زد میں آ گیا ہے۔ ماہرین کا کہنا ہے کہ ڈیجیٹل ادائیگی کے بغیر ٹیکس ڈاکیومنٹیشن متاثر ہونے کا خدشہ بڑھ رہا ہے، جس سے ریونیو وصولیوں میں شفافیت قائم رکھنا مشکل ہو سکتا ہے۔
شہریوں اور صارفین نے مطالبہ کیا ہے کہ پی آر اے فوری طور پر ڈیجیٹل پیمنٹ سسٹم کو فعال بنائے اور کیو آر کوڈ و راست ادائیگی کے نفاذ کو یقینی بنانے کے لیے سخت مانیٹرنگ اور کارروائی عمل میں لائی جائے۔