ویب ڈیسک: پنجاب میں تعلیمی نقصان کے خدشات کے پیش نظر نجی اسکولوں نے گرمیوں کی چھٹیوں کے دوران محدود اوقات میں تعلیمی سرگرمیاں جاری رکھنے کی تجویز دے دی ہے۔

تفصیلات کے مطابق پنجاب بھر کے نجی تعلیمی اداروں نے حکومت سے مطالبہ کیا ہے کہ موسمِ گرما کی تعطیلات کے دوران"سمر کیمپس" کے انعقاد کی اجازت دی جائے۔ اس حوالے سے تجویز دی گئی ہے کہ کلاسز صبح 7 بجے سے 10 بجے تک منعقد کی جائیں تاکہ طلبہ شدید گرمی اور ہیٹ ویو سے محفوظ رہتے ہوئے تعلیم جاری رکھ سکیں۔

اسکول مالکان کے مطابق حالیہ غیر اعلانیہ چھٹیوں اور بار بار تعلیمی تعطل کے باعث طلبہ کو نمایاں تعلیمی نقصان ہوا ہے اور " لرننگ گیپ"  بڑھ رہا ہے، جسے پورا کرنے کیلئے سمر کیمپس ایک مؤثر حل ثابت ہو سکتے ہیں۔

نجی اسکولوں کی نمائندہ تنظیموں نے مؤقف اختیار کیا ہے کہ صبح کے اوقات میں موسم نسبتاً بہتر ہوتا ہے، اس لیے محدود دورانیے کی کلاسز سے نہ صرف نصاب کی تکمیل ممکن ہوگی بلکہ طلبہ کی تعلیمی کارکردگی بھی بہتر ہو سکے گی۔

دوسری جانب محکمہ اسکول ایجوکیشن کے ذرائع کا کہنا ہے کہ ماضی میں سمر کیمپس کی اجازت عام طور پر ایک ماہ کیلئے دی جاتی رہی ہے، تاہم رواں سال حتمی فیصلہ حالات کے پیش نظر کیا جائے گا۔ اس ضمن میں منظوری مریم نواز کی جانب سے دی جائے گی۔

تعلیمی ماہرین اور والدین اب حکومتی فیصلے کے منتظر ہیں کہ آیا اس سال گرمیوں کی چھٹیوں میں بھی باقاعدہ تعلیمی سرگرمیاں جاری رہیں گی یا نہیں۔