سٹی42:  وزیر دفاع خواجہ آصف نے کہا ہے کہ "پاکستان نہیں تو ہم نہیں" کا نعرہ آج دہشت گردی اور بھارت کے خلاف جنگ میں ہمارے شہیدوں اور غازیوں کی زبان پرہے۔

اپنے بیان میں خواجہ آصف نے کہا ہمارے شہیدوں اور غازیوں کے حوصلوں اورقربانیوں کی داستانیں ان کوبھی سنائیں جو کہتے ہیں"خان نہیں توپاکستان نہیں"، اس پاکستان کے لیے آگ اور خون کا دریا عبور کرنا پڑا تھا، لاکھوں لوگ شہید ہوئے، لاکھوں کی عصمتیں لٹیں، لاکھوں دشمن کے ہاتھوں اغوا ہوگئیں۔

خواجہ آصف نے کہاکہ سیالکوٹ آئیں، میں آپ کوجموں وکشمیرکے مہاجروں کی قربانیوں کی داستانیں سنواؤں، حامدمیر سےسنیں کہ اس کے نانا نےجموں وکشمیر سے ہجرت کی قیمت کیا ادا کی۔

خواجہ آصف نے کہا،  سیالکوٹ شہر کے محلوں گلیوں اور چناب کے کنارے آباد ان مہاجروں سے پوچھیں، مہاجروں نے رسول آقائے دو جہاں ﷺ کی سنت کس طرح ادا کی، مہاجروں نے کس طرح خون کی لکیر کوعبور کرکےپاک سر زمین پر پہنچنے کے بعد شکر کےسجدےکئے تھے۔

وزیر دفاع خواجہ آصف نے کہا کہ "پاکستان نہیں تو ہم نہیں"، یہ وہ نعرہ  ہے جو آج دہشت گردی اور بھارت کے خلاف جنگ میں ہمارے شہیدوں اور غازیوں کی زبان پرہے، پاک فوج زندہ باد، پاکستان پائندہ باد۔