سٹی 42 : وفاقی وزیر پٹرولیم علی پرویز ملک سے پاکستان کی  ریفائنریز کے سی ای اوز پر مشتمل وفد کی ملاقات ہوئی ۔

ریفائنری سی ای اوز نے کہا کہ حالیہ پاک بھارت کشیدگی کے تناظر میں مسلح افواج کی ایندھن کی ضروریات پوری کرنے کے لیے مکمل طور پر تیار ہیں، دفاعی ضروریات کو کسی بھی صورت حال میں سپورٹ کرنے کے لیے اسٹریٹجک ایندھن کے ذخائر اور بلا تعطل پیداواری صلاحیت موجود ہے ۔ علی پرویز ملک نے اس موقع پر کہا کہ دفاعی ضروریات کے لیے ریفائنریز کے پیشگی اقدامات کو سراہتے ہیں ۔ 

علی پرویز ملک نے کہا کہ ریفائنری اپگریڈ یشن اور طویل مدتی استحکام کو یقینی بنانے کے لیے سازگار پالیسی ماحول فراہم کرنے کے لیے کام کر رہے ہیں ۔ انہوں نے ریفائننگ انڈسٹری کی ترقی  اور صارفین کے لیے سستی و پائیدار توانائی کی فراہمی کے لیے حکومتی سپورٹ کا اعادہ کیا۔ 

وفد میں پاکستان ریفائنری لمیٹڈ، پارکو، اٹک ریفائنری لمیٹڈ، نیشنل ریفائنری لمیٹڈ، سائنرجیکو کے سی ای اوز شامل تھے ۔