ویب ڈیسک: وزیراعلیٰ پنجاب مریم نواز کے وژن کے تحت لاہور شہر کو تجاوزات سے پاک کرنے کے لیے ضلعی انتظامیہ متحرک ہو گئی ہے۔ ڈی سی لاہور سید موسیٰ رضا کی ہدایت پر شہر بھر میں تجاوزات کے خلاف مؤثر کارروائیاں جاری ہیں۔
ضلعی انتظامیہ اور میٹروپولیٹن کارپوریشن لاہور (ایم سی ایل) کا ریگولیشن اسکواڈ شہر بھر میں متحرک ہے۔ میٹروپولیٹن آفیسر ریگولیشن کاشف جلیل کے مطابق مختلف مارکیٹوں اور علاقوں سے اب تک 671 تجاوزات کا خاتمہ کیا جا چکا ہے جبکہ تجاوزات میں موجود سامان ضبط کر لیا گیا ہے۔
بصری آلودگی کے خلاف بھی بھرپور ایکشن لیتے ہوئے 2,565 غیر قانونی بینرز، فلیکسز اور پوسٹرز کو اتار دیا گیا ہے۔ اہم تجارتی مراکز کے اطراف سے ٹریفک کی روانی میں رکاوٹیں دور کی گئی ہیں۔
حکام کے مطابق شہر کی اہم شاہراؤں کو مستقل طور پر تجاوزات سے پاک رکھنے کے لیے نگرانی جاری ہے۔ ڈپٹی کمشنر لاہور کا کہنا ہے کہ لاہور کو صاف ستھرا اور خوبصورت بنانا اولین ترجیح ہے۔ ان کا مزید کہنا تھا کہ شہر میں کسی کو تجاوزات قائم کرنے کی اجازت نہیں دی جائے گی۔
ضلعی انتظامیہ کو ہدایات جاری کی گئی ہیں کہ وال چاکنگ، بینرز اور پوسٹرز کا مکمل خاتمہ یقینی بنایا جائے اور ٹریفک کی روانی میں خلل ڈالنے والی ہر رکاوٹ کو فوری طور پر ہٹایا جائے۔