راؤ دلشاد: محکمہ اقلیتی امور و انسانی حقوق نے اس سال کرسمس سیزن کو بھرپور انداز میں منانے کا فیصلہ کر لیا ہے۔

 اس سلسلے میں متعدد تقریبات اور خصوصی سرگرمیوں کا شیڈول ترتیب دیا گیا ہے۔ صوبائی وزیرِ اقلیتی امور سردار رمیش سنگھ اروڑہ کی قیادت میں کرسمس ریلی نکالی جائے گی جو گرجہ چوک کینٹ سے شروع ہو کر لبرٹی چوک تک پہنچے گی۔ ریلی کے اختتام پر لبرٹی چوک میں کرسمس ٹری بھی سجایا جائے گا۔

کرسمس کی مناسبت سے تعلیمی اداروں میں خصوصی ایونٹس منعقد کیے جائیں گے جبکہ کرسمس گالا کے تحت میوزیکل اور اسپورٹس ایونٹس بھی کرائے جائیں گے۔ پنجاب یونیورسٹی، فارمین کرسچن کالج یونیورسٹی اور کینیئرڈ کالج سمیت مختلف اداروں میں تقاریب کا انعقاد کیا جائے گا۔

صوبائی وزیر سردار رمیش سنگھ اروڑہ نے کہا کہ رواں سال کرسمس سیزن منفرد اور خصوصی تقریبات پر مشتمل ہوگا۔ انہوں نے بتایا کہ مینارٹی کارڈ کے تحت 75 ہزار خاندانوں کو 10,500 روپے سہ ماہی گرانٹ دی جا رہی ہے، جب کہ ایسٹر گرانٹ اور ای لرننگ پروگرام سمیت متعدد فلاحی اقدامات بھی جاری ہیں۔

انہوں نے مزید بتایا کہ وزیراعلیٰ کی جانب سے 10 ہزار مسیحی خاندانوں کو فی کس 15 ہزار روپے گرانٹ دی جائے گی۔ گرجا گھروں کی تزئین و آرائش کو بھی یقینی بنایا گیا ہے تاکہ مسیحی برادری اپنی مذہبی رسومات بہتر ماحول میں ادا کر سکے۔

صوبائی وزیر اقلیتی امور سردار رمیش سنگھ اروڑہ نے سٹی 42 سے گفتگو کرتے ہوئے کہا کہ حکومت اقلیتی برادری کی فلاح و بہبود کے لیے مؤثر اقدامات جاری رکھے ہوئے ہے اور کرسمس سیزن کی تقریبات اس سلسلے کی ایک اہم کڑی ہیں۔