سعید احمد:سکیورٹی خدشات کے پیشِ نظر آج کوئٹہ ڈویژن میں ٹرین آپریشن مکمل طور پر بند رہے گا۔
لاہور میں واقع پاکستان ریلوے ہیڈکوارٹر کی جانب سے اس حوالے سے باقاعدہ ہدایات جاری کر دی گئی ہیں۔
ذرائع کے مطابق کوئٹہ ڈویژن کے مختلف روٹس پر چلنے والی تمام ٹرینیں منسوخ کر دی گئی ہیں۔ کوئٹہ سے سبی، چمن اور زاہدان کے درمیان ٹرین سروس آج معطل رہے گی۔
اسی طرح پشاور سے براستہ لاہور کوئٹہ جانے والی جعفر ایکسپریس کو جیک آباد تک محدود کرنے پر بھی غور کیا جا رہا ہے، تاہم اس حوالے سے حتمی اعلان بعد میں متوقع ہے۔
پاکستان ریلوے حکام کا کہنا ہے کہ منسوخ کی جانے والی تمام ٹرینوں کے مسافروں کو مکمل ریفنڈ فراہم کیا جائے گا، جبکہ سکیورٹی صورتحال کا جائزہ لینے کے بعد ٹرین آپریشن بحال کرنے کا فیصلہ کیا جائے گا۔