سٹی42:  پنجاب پولیس نے صوبے بھر میں کارروائیاں کرتے ہوئے 24 گھنٹوں کے دوران 27 جرائم پیشہ گینگز کے 66 کارندوں کو گرفتار کر لیا۔

ترجمان پنجاب پولیس کے مطابق ملزمان سے بھاری مقدار میں اسلحہ برآمد کیا گیا جس میں کلاشنکوف، پستول، رائفلز، بندوقیں اور 113 مختلف ہتھیاروں کے علاوہ بڑی تعداد میں گولیاں شامل ہیں۔

کارروائیوں کے دوران 60 موٹر سائیکلیں، 52 موبائل فونز، 15 مویشی اور 40 لاکھ روپے نقدی بھی برآمد کر لی گئی۔

ترجمان کا کہنا ہے کہ 263 اشتہاری مجرم، 101 عدالتی مفرور اور 100 عادی مجرموں کو بھی قانون کی گرفت میں لایا گیا۔ پولیس مقابلوں میں 6 مجرمان کو انجام تک پہنچایا گیا جبکہ 2 زخمی ہوئے۔

آئی جی پنجاب ڈاکٹر عثمان انور نے جرائم پیشہ عناصر کے خلاف جاری آپریشنز کو مزید تیز کرنے اور ان کارروائیوں کو بلا تعطل جاری رکھنے کی ہدایت جاری کر دی ہے۔