سٹی 42 : سکیورٹی فورسز نے بلوچستان کے ضلع ژوب میں جامع سینیٹائزیشن آپریشن کرتے ہوئے 10 خوارج جہنم واصل کردیئے ۔
آئی ایس پی آر کے مطابق 24 فروری 2026 کو ضلع ژوب بلوچستان میں انٹیلی جنس بیسڈ آپریشن کے تسلسل میں 25 فروری کو سیکیورٹی فورسز نے بلوچستان کے ضلع ژوب میں جامع سینیٹائزیشن آپریشن کیا، آپریشن کا مقصد بھارتی پراکسی فتنہ الخوارج سے تعلق رکھنے والے چھپے ہوئے خوارج کا تعاقب کرنا تھا۔
آپریشن کے دوران فورسز نے مختلف راستوں پر خوارج کا سراغ لگایا اور ان کے ٹھکانوں کو مؤثر طریقے سے نشانہ بنایا۔ فائرنگ کے تبادلے کے بعد بھارتی سرپرستی میں کام کرنے والے مزید دس خوارج ہلاک کر دیے گئے۔ ہلاک خوارج سے اسلحہ، گولہ بارود اور دھماکہ خیز مواد بھی برآمد کیا گیا۔ ہلاک دہشت گرد علاقے میں متعدد دہشت گرد کارروائیوں میں ملوث تھے۔
علاقے میں موجود کسی بھی بھارتی اسپانسرڈ دہشت گردوں کے خاتمے کے لیے سینیٹائزیشن آپریشن جاری ہے۔ قومی ایکشن پلان کی وفاقی ایپکس کمیٹی سے منظور شدہ وژن عزم استحکام کے تحت سیکیورٹی فورسز اور قانون نافذ کرنے والے اداروں کی دہشت گردی کے خلاف مہم پوری قوت سے جاری رہے گی۔ ملک سے بیرونی سرپرستی میں ہونے والی دہشت گردی کے ناسور کے مکمل خاتمے تک کارروائیاں جاری رہیں گی۔