(ویب ڈیسک)قطر کے انڈسٹریل سٹی میں واقع  ایک فیکٹری میں ہونے والے زوردار دھماکہ کے نتیجے میں 12 بھارتی شہریوں کی موت ہو گئی۔ اس حادثہ میں مجموعی طور پر 13 افراد ہلاک ہوئے ہیں۔ بھارتی شہریوں کی ہلاکت پر افسوس کا اظہار کرتے ہوئے وزیر خارجہ ایس جے شنکر نے کہا کہ ’’یہ انتہائی افسوس ناک واقعہ ہے۔ ہمارا سفارتخانہ قطری حکام کے رابطے میں ہے اور متاثرہ بھارتی شہریوں کے اہل خانہ کی مدد میں مصروف ہے‘‘۔
 حادثہ کے بارے میں وزیر خارجہ ڈاکٹر ایس جے شنکر نے کہا کہ ’’قطر کے راس لفان انڈسٹریل سٹی میں ہونیوالے دھماکہ میں بھارتی شہریوں سمیت متعدد افراد کی ہلاکت اور زخمی ہونے کی خبر سے بہت تکلیف ہوئی ہے۔ ہمارا سفارتخانہ قطری حکام کے ساتھ مسلسل رابطے میں ہے‘‘۔انہوں نے مزید کہا کہ ’’سفارتخانہ متاثرہ بھارتی شہریوں کے اہلخانہ کی مدد کی کوشش کر رہا ہے۔ ہماری ہمدردیاں اور دعائیں متاثرین اور ان کے خاندانوں کے ساتھ ہیں‘‘۔

Deeply saddened by the loss of lives and injuries, including of Indian nationals, in the explosion at Qatar’s Ras Laffan Industrial City.

As further details emerge, our Embassy continues to be in touch with Qatari authorities, and is reaching out to render assistance to the… https://t.co/tHifrYGvPT

— Dr. S. Jaishankar (@DrSJaishankar) June 22, 2026

اس سے پہلے قطر کے حکام نے بتایا تھا کہ راس لفان انڈسٹریل سٹی میں اتوار کو ایک فیکٹری میں ہونے والے دھماکہ میں ہلاک ہونے والے 13 افراد میں 12 بھارتی شہری شامل ہیں۔راس لفان انڈسٹریل سٹی میں برزان لوکل گیس سپلائی فیسلٹی  میں ہونے والے دھماکہ میں متعدد بھارتیوں سمیت 66 افراد زخمی ہوئے۔ گزسشتہ روز ایک پریس بریفنگ کے دوران قطر کے وزیر توانائی سعد بن شریدہ الکعبی نے بتایا کہ اس حادثہ میں بھارتی اور پاکستانی نژاد 13 افراد ہلاک ہوئے ہیں۔ حکام کے مطابق زخمیوں میں قطری شہریوں کے علاوہ بھارتی، پاکستانی، بنگلہ دیشی، کینیائی، گھانائی، تنزانیائی، نائجیریائی اور نیپالی شہری بھی شامل ہیں۔ زخمیوں کو بہتر علاج کیلئے فوری طور پر طبی مراکز منتقل کر دیا گیا۔