سٹی42: پاکستان انٹرنیشنل ایئرلائن (پی آئی اے) نے سینئر ترین ڈاکٹر قادر شاہ کو جنرل منیجر (جی ایم) میڈیکل سروسز تعینات کرنے کا باضابطہ نوٹیفکیشن جاری کر دیا ہے۔ اس سے قبل انہیں عبوری بنیادوں پر اس عہدے کی ذمہ داریاں سونپی گئی تھیں۔

ترجمان پی آئی اے کے مطابق ڈاکٹر قادر شاہ کو اب جی ایم میڈیکل سروسز کا آفیشیٹنگ چارج دے دیا گیا ہے۔ ذرائع کا کہنا ہے کہ یہ تعیناتی سنیارٹی کی بنیاد پر کی گئی ہے، کیونکہ ڈاکٹر قادر شاہ ادارے کے سینئر ترین میڈیکل آفیسرز میں شمار ہوتے ہیں۔

واضح رہے کہ اس سے قبل ایک متنازع فیصلے کے تحت پی آئی اے کارگو کے ایک ملازم طارق حسین کو جی ایم میڈیکل سروسز تعینات کر دیا گیا تھا، جس پر اندرونی سطح پر اعتراضات بھی سامنے آئے تھے۔

ذرائع کے مطابق پی آئی اے انتظامیہ نے اب سنیارٹی کو مدنظر رکھتے ہوئے فیصلہ کیا ہے تاکہ ادارے میں میرٹ اور پیشہ ورانہ نظم و ضبط کو فروغ دیا جا سکے۔