ویب ڈیسک: بالی وڈ کے معروف سینئر اداکار انوپم کھیر نے اپنی شخصیت کے ایک دلچسپ پہلو، یعنی اپنے بالوں کے بارے میں کھل کر بات کی ہے۔

 انہوں نے بتایا کہ جب انہوں نے 1981 میں فلمی دنیا میں قدم رکھا تو وہ مکمل طور پر گنجے تھے، جس کی وجہ سے کئی لوگوں نے ان کے اداکاری کے خواب کو سنجیدگی سے نہیں لیا۔

اس کے باوجود انہوں نے ہمت نہیں ہاری اور بعد میں دل والے دلہنیا لے جائیں گے، ہم آپ کے ہیں کون اور دی کشمیر فائلز جیسی بڑی اور کامیاب فلموں میں کام کر کے اپنی صلاحیتوں کا لوہا منوایا۔

ایک حالیہ انٹرویو میں انہوں نے انکشاف کیا کہ متعدد ہیئر ٹرانسپلانٹ کمپنیاں اور ڈاکٹرز انہیں بال لگوانے کے بدلے پیسے دینے کو تیار تھے، لیکن انہوں نے ہمیشہ اس پیشکش کو رد کیا۔ ان کا کہنا تھا کہ بہت سے لوگ چاہتے ہیں کہ وہ ایک بار ان کی خدمات حاصل کریں، مگر وہ ایسا نہیں کرنا چاہتے کیونکہ اس سے انہیں محسوس ہوگا کہ وہ اپنی اصل شناخت کھو بیٹھیں گے۔

انہوں نے ایک دلچسپ واقعہ بھی سنایا کہ جب ان کا بیٹا سکندر کھیر بچپن میں تھا تو ایک دن وہ اخبار پڑھ رہے تھے۔ سکندر کو لگا کہ وہ بالوں کے تیل کا اشتہار دیکھ رہے ہیں، جس پر اس نے فوراً کہا کہ اس بارے میں سوچنا بھی مت۔ انوپم کھیر کے مطابق، ان کے خاندان کا حسِ مزاح ہی ان کی سب سے بڑی طاقت ہے۔

انہوں نے نوجوانوں کے حوالے سے بھی بات کرتے ہوئے کہا کہ وہ خود کو ان کا دوست سمجھتے ہیں اور چاہتے ہیں کہ لوگ انہیں سر یا انکل کہنے کے بجائے ’اے کے‘ یا ’انوپم جی‘ کہہ کر پکاریں۔