ویب ڈیسک: چین کے وزیر خارجہ وانگ یی نے امریکا پر زور دیا ہے کہ وہ چین کے بنیادی مفادات کا احترام کرے اور ون چائنا پالیسی پر مکمل طور پر عمل کرے۔
فلپائن کے دارالحکومت منیلا میں امریکی وزیر خارجہ مارکو روبیو سے ملاقات کے دوران وانگ یی نے کہا کہ چین اور امریکا کے درمیان تعلقات ایک اہم مرحلے میں داخل ہو چکے ہیں اور دونوں ممالک کو قیادت کے درمیان طے پانے والے اتفاق رائے پر عملدرآمد کرتے ہوئے تعلقات کو مثبت سمت میں آگے بڑھانا چاہیے۔
انہوں نے امریکا سے اختلافات کو ذمہ داری سے سنبھالنے، چین کے جائز تحفظات کا احترام کرنے اور ایسے اقدامات سے گریز کرنے کا مطالبہ کیا جو دوطرفہ تعلقات پر منفی اثر ڈال سکتے ہیں۔ ملاقات میں دونوں رہنماؤں نے علاقائی اور عالمی امور پر بھی تبادلہ خیال کیا۔
دونوں فریقوں نے اعلیٰ سطح کے رابطے برقرار رکھنے، سفارتی تعاون کو فروغ دینے اور چین امریکا تعلقات میں تعمیری پیش رفت کے لیے مشترکہ کوششیں جاری رکھنے پر اتفاق کیا۔